Bengaluru, Risaw:
U Symbud Myntri Rangbah jong ka Karnataka u Dr G Parameshwara, uba bat ruh ïa ka kam ha ka Revenue, u la ong ba ka jylla ka la mad ïa ka jingduhnong kaba la antad ba ka la long kumba T.46,000 klur ha kylleng ki 177 tylli ki Taluk namar ka jingtyrkhong um.
“Ngi la pan pisa T.10,000 klur haduh 11,000 klur kum ka bai lutksan na ka sorkar pdeng bad ngin sa aiti ïa ka jingthoh ba khatduh ryngkat bad u Myntri Rangbah ka jylla u DK Shivakumar, shen” u la ong.
Haba kynthoh halor ka jingpynkiew ka jingsiew ha ka jingshakri ka Revenue Department, u Dr Parameshwara u la ong ba ka jingkiew ka long kaba rit bad kaba dei namar ka jingkiew dor jong ka jinglut jingsep kaba man u bnai.
U la ong ruh ba ka sorkar jylla ka donkam ban pynkhlaiñ ïa la ki jong ki lad kamai, khamtam haba don ka jingduna ha ka pisa kaba dei ban siew na ka sorkar pdeng. Kumta, la pynkiew khyndiat eh ïa ka bai lutksan na ka bynta ki katto katne ki kam sorkar, u la ong ha ki nongthoh khubor ha ka lah sngi U Blei.
U Dr Parameshwara u la ong ba ki lai tylli ki kynhun jong ka sorkar pdeng kiba jurip bniah halor ka jingrang tyrkhong ha Karnataka ki la dei ban pyndep ïa ka jingjurip jong ki hynnin ka sngi.
“Ki leit jngoh ïa ki lai haduh saw tylli ki distrik man ka sngi. Ki la bishar bniah ïa ki 101 tylli ki taluk kiba la pynbna ba ki shah ktah ha ka jingrang tyrkhong ha kaba sdang. Ngi la kyrpad ïa ki ban bishar bniah ïa ki 77 tylli ki taluk kiba ngi la pynbna ba ki shah ktah ha ka jingrang tyrkhong ha ka thup kaba ar jong ngi. Ki dkhot jong ka kynhun ki dang ïakynduh beit bad ki nongrep. Ki dang sakhi ïa kajuh kaba ngi la lap ha ka jingwad bniah jong ngi. Ki DC bad ki CEO ruh ki dang ïakren bad ka kynhun,” ong u DCM da kaba bynrap ba ka kynhun jong ka sorkar pdeng kan aiti ïa ka kaiphod jong ka sha ka sorkar pdeng bad katkum ka kaiphod, ka Karnataka kan pan bai lutksan.
U la ong ruh ba ki dang pyrkhat ban rah ïa ka kynhun sha Delhi bad ban aiti ïa ka jingthoh ba khatduh sha ka sorkar pdeng bad ban pan bai lutksan.
U Dr Parameshwara u la pynpaw ïa ka jingsngewkhia halor ka jinglum khajna GST.
U la ong ba ka jingkyrduh kaba jur ha Karnataka ka lah ban ktah ïa ka jinglum GST namar ka jingduhnong jong ki jingthung ka ktah ïa ki bynta bapher bapher jong ka ïoh ka kot.
U la ong ba ka Karnataka ka la ju don ha ka kyrdan kaba ar ha ka ri ha ka jinglum GST bad ka bud ïa ki kyndon jong ka sorkar pdeng ban pynthikna ba kan ym don kano kano ka jingduna.
“Ka sorkar ka la buh ïa ka jingïada ban ïaleh pyrshah ïa ka jingktah bad ka dang wad ïa ki lad ki lynti ban kyntiew ïa ka jingmih na ka GST,” u la bynrap.
U Dr Parameshwara u la ong ba ka sorkar jylla ka la ai ïa ka jingujor ba la pynshong nongrim ha ki sakhi sabut sha ka Election Commission halor ka jingkynnoh ba la pyndonkam bakla ïa ki aplikeshon Form 7.
Haba buh jingkylli ïa ka jingbun ki aplikeshon ba la thep da ki riew shimet, u la kylli hato ka don kano kano ka jingpynbeit ïa ka jingbun ki aplikeshon Form 7 kiba uwei u briew u lah ban thep.
Ki dkhot ka Central Drought Study Committee ki la hiar sha ki distrik kiba kynthup ïa ka Mysuru, Bagalkot bad Vijayanagara ha kane ka lah sngi U Blei.
