Hyderabad, Risaw:
U MP ka seng BJP ha Telangana, u M Raghunandan Rao, u la leit sha u nongbishar ba hakhliehduh jong ka Telangana, ban pan ïa ka jingtohkit kaba laitluid da u nongbishar ba dang don ha ka kam halor ki jingkynnoh kiba ïadei bad ki jingdon jingem, ki jaka bad ki jingmyntoi jong ka kam khaïi jong u Myntri Rangbah ka jylla, u Revanth Reddy, u president ba mynta jong ka BRS, u KT Rama Rao (KTR) bad kiba haïing ha sem jong ki.
U Raghunandan Rao u la pan jingbishar bniah ïa ka khajna, ka jingpynrung kyrteng, ki kompeni, ki kot ki sla khajna bad ki kot ki sla jong ka elekshon, da kaba kynthoh ba ki jingkynnoh ki donkam ïa ka jingtohkit kaba khlem shah liang ban ïa ki jingkynnoh saiñ pyrthei. Kane baroh ka wan hapdeng ka thma jong ki jingkynnoh kaba nang jur hapdeng ka Congress kaba bat ïa ka jingsynshar bad ka BRS halor ki jingïateh kular jaka, ki jingdon jingem bad ki jingmyntoi ha ka kam khaïi.
U Revanth Reddy u ju kynthoh beit ïa u Myntri Rangbah barim ka jylla bad u heh duh ka BRS u K Chandrasekhara Rao (KCR) bad ïa ka ïing ka sem jong u halor ki jingkynnoh ba ki don ki jingïateh halor ka khyndew bad ki jingdon jingem. Ha ka jingïalang ba dang shen ha ka jaka ba kyrshan bha ïa ka BRS ha Sircilla, u Revanth Reddy beit beit u la pynibor ïa u KTR halor ki jingdon jingem bad ki jingbei tyngka.
U la buh jingkylli halor ka jinglong trai jong ki Hospitality Properties kiba don sawdong jong ka HITEC City, kynthup ïa ki Deccan Serai bad ka AtHome serviced Apartment, bad u la kdew ruh ïa ki jaka ba la kynnoh ba ki don ha Banjara Hills, Jubilee Hills bad ki ïing rep ha Janwada, Shankarpally, Moinabad bad Erravelli.
“Mano ba dei trai ïa ki Five Star Hotel jong ka Deccan Serai? Mano ba dei trai ïa ki ïing ba la ai jingshakri ha ka AtHome serviced Apartments?” U Revanth u la kylli, haba kynnoh ba ka longïing KCR ka la lum ïa ka spah haduh kumba 1 lak klur tyngka ha ka shisnem ba ka la synshar.
U la tuklar ruh ïa u KTR, u KCR, u Harish Rao bad u Santosh Kumar ba kin pynmih ïa ka kot pynshai halor ki jingdon jingem jong ki, da kaba bynrap, “Ka bynta-2 ka dang wan.”Ka BRS ka la kyntait ïa ki jingkynnoh bad ka la phai khmat sha ka ïing ka sem jong u Revanth Reddy.
U nongïalam ka BRS u Manne Krishank u la dawa ïa ka jingtohkit jong ka kynhun ED halor ki jingkynnoh ba ki don bynta ha ka kam khaïi kaba ïadei bad ki Hospital Medicover, Maxbien Pharma bad kiwei kiwei ki kompeni. U la kynnoh, khlem da ai ïa ki sakhi ba la pynshisha paidbah, ba ka pisa kaba T.13,000 klur kaba khlem buh jingkheiñ la pynlong aiñ lyngba ki jingpynïaid ba ïadei bad ka Medicover.
“Kine kim dei ki jingkylli ba la pynmih ha suiñ. Ngi buh ïa ki kot ki sla, ki kot ki sla jong ki kompeni bad ki jingtip ba bniah shaphang ka pisa hakhmat ki paidbah bad ki tnad tohkit.” U Krishank u la ong. Hapdeng ki jingkynnoh jong u, la mudui ruh ïa ka mukotduma kaba thymmai pyrshah ïa u Krishank.
Ka jingïakynad ka la nang jur shuh shuh ha ka lah sngi U Blei haba u MLA ka BRS u KP Vivekananda u la ai por 24 kynta ïa u Revanth Reddy ban jubab ïa kitei ki jingkynnoh, da kaba maham ba ka seng kan pynlong ïa ka jingïakhih lada um lah ban leh ei ei halor kane.
Da kaba baroh ar ki seng synshar bad ki seng pyrshah ba kongsan ki ïadon bynta ban kynnoh bad ïakdew kti markylliang halor ka kam klop, ka seng BJP mynta ka wad ïa ka jingïarap jong ka ïingbishar ban bishar bniah laitluid ïa ki jingdon jingem bad ki jingïadei kam khaïi jong baroh arliang mamla.
