Shillong, Risaw 15
Ka lahduh jong ka Shillong Premier League 2026, ka Mawlai kan ïakynduh pyrshah ïa ka Nongkseh ha ka semi final kaba nyngkong jong ka SSA Super Cup 2026 mynta ka sngi Thohdieng ha SSA Stadium ha ka por 5 baje janmiet.
Kine ki kynhun ki la long kiba kynsai ha kane ka nongbah bad mynta kin ïaknieh ban ïoh rung sha ka final bad ruh ban khur ïa ka nam lahduh.
Ka Mawlai kum ka lahduh ha ka SPL, ka la ïoh rung sha ka semi final ryngkat ka Shillong Lajong kaba la wan ba-ar, ka ban ïakynduh pyrshah ïa ka Meghalaya Police ha ka semi final kaba ar ka ban long ha ka sngi Saitjaiñ.
Haba phai sha ka Nongkseh, ka la wan ha ka kyrdan balai ha ka SPL, ha kaba ka la hap ban ïakhun ïa ka playoff ha ka Super Cup. Te kumta ka la pynliem noh ïa ka Sawmer ha ka sngi Ba-ar da 4-2 kol.
Kine ki ar tylli ki kynhun ki la ïakynduh ha ka SPL mynta u snem, ka jingïalehkai ka la long kaba ïakhaid bha, hynrei u Damanbhalang Chyne u la lah ban pynurlong na ka bynta ka Mawlai u la ïoh ban pynkhih jar lyngba ka free-kick ha ka minit kaba san hashwa ban kut ka jingïalehkai jong ka kylla step. Te kumta ka la khur ïa ki lai 3 poiñ.
Te kumta ka Nongkseh mynta kan ïoh ïa ka lad ban siew kylliang ïa kata ka jingshah rem, katba ka Mawlai kan ïakhun tyngeh ban khanglad ïa ka liang pyrshah ha kane ka jingïakhun.
