Shillong, Risaw 19
U rangïakura (professional boxer) u Ïarapborsing Kharbani, uba long u coach bad u nongseng ïa ka IDM Fitness and Fight Club, u la khur ïa ka jingjop ha ka Arunachal Pro Boxing Season 4, ha ka 15 tarik mynta u bnai Risaw.
Kane ka jingjop ka long ka jingsngew sarong ïa ka IDM Fitness and Fight Club bad ka Jylla hi baroh kawei, kaba wanrah ha ka jingithuh ïa ka imlang sahlang na ka bynta ki nongïalehkai ka Jylla bad ka jingnang roi ha ka jingdon ki ‘combat sports’.
Kum u nongïalehkai bad kum u coach, u Bah Kharbani u pyni ïa ka mynsiem jingaiti, ka jinglong ryntih bad ka jingminot haba ïalehkai halor rynsan kaba u la noh synñiang ban kyntiew ïa ki nongïalehkai kiba kwah ban pynjanai ïalade. Ka jingjop jong u ka long kum ka jingai mynsiem ïa ki samla ïalehkai ha kylleng ka Jylla kiba angnud ban bteng ïa ka kam ïalehkai ïakura bad ban ïakhun ha ki kyrdan kiba kham shalor.
Na ka liang ka IDM Fitness and Fight Club ka la pynpaw ka jingsarong halor kane ka jingjop jong u bad ka la ai khublei ruh ïa u Bah Kharbani halor kane ka jingjop.
