Shillong, Risaw 19
Ka Nongkseh ka la rah ïa ka nam lahduh ha ka SSA Super Cup, hadien ba ka la pynliem noh ïa ka Meghalaya Police FT da 3-0 kol ha ka lah sngi U Blei ha SSA Stadium, Polo.
Ka kol ba la kum thep hi tang mar ïasdang ka jingïalehkai ha ka minit kaba 8 ka la long ka jingïarap ïa ka Nongkseh hashwa ba u Dawanchwa Challam un pynbud ïa ka kol kaba ar ha ka minit kaba 78 bad kawei pat da u kapten u Hardy Cliff Nongbri (86).
Kumba ka paw ka SSA Stadium hynne ka sngi ka la dap hi sman da ki nongkyrshan jong kine ki kynhun. U Chesterpaul Lyngdoh u la pyrshang ban pynbuh bol na ka bynta u Kitboklang Pale hapoh ‘box’ hynrei u Wanteilang Kharkongor jong ka MLP u la lah ban khanglad na ka jingshah thep.
Ha kaba nyngkong ki rangïalehkai ka Nongkseh ki la sdang ban tlot ha ka rukom ïalehkai ha ka bynta kaba shadien, na ka daw ba ka MLP ka la ïakhun tyngeh.
U Chesterfield Nongdhar u la hap ban shut na jngai ha ka minit kaba 19 ha kaba ka la leit dei na diengkol. Kumjuh u Bisharlang Kharumnuid u la pyrshang ban ïakhun tyngeh na ka bynta ka MLP, hynrei ki la shu long lehnohei.
Ha ka Nongkseh ka la nangïoh bor ha ka kylla miet hadien ba u Shano Tariang u la ïoh mih madan bad u la ïoh ban shut ïa ka bol kaba la her shajngai.
Hadien arphew minit u Hameda -manbha Wahlang u la ïoh ban pynbuh bol kaba biang eh na ka bynta u Shano, hynrei u rangapkol ka MLP u Eveningstar Bareh u la lah ban pyllait na ka jingshah thep.
Shuh shuh u Shano u la ïoh biang ïa ka kabu ksiar ban pynbuh na ka bynta u Dawanchwa, hynrei um shym la lah ban thep. Hashwa ban wai u Hardy u la lah ban pynurlong ïa ka jingthep kol ka jong u bad ban khur ïa ka jingjop.
Ha kane ka sdang la don lang u Myntri ka tnat ïalehkai Bah Wailadmiki Shylla ha ryngkat u Chief Secretary barim ka Jylla Bah Donald P Wahlang, ka Director General of Police Kong Idashisha Nongrang, u President ka Meghalaya Football Association Bah Hamletson Dohling, u General Secretary ka MFA Bah Sunesh Syiem lem bad ki dkhot ka SSA hapoh ka jingïalam u President Bah Banteidor Lyngdoh, MLA.
Te kumta ka Nongkseh kum ka lahduh ka la ïohpdiang khusnam pisa kaba T. 2 lak bad ka MLP ka la ïoh T. 1 lak. Ïa ka nam T7 Player of the Final la khur da u Chesterpaul Lyngdoh jong ka Nongkseh.
