Shillong, Risaw 19
i nongmareh ba paw ka Jylla, Kong Kmoiñ Wahlang i la lah ban pyndep ïa ka jingïakop mareh ha ka kyrdan ïakop ha ka Delhi Half Marathon 2026 ha ka sngi U Blei da kaba I la lah ban pyndep ha ki 2 kynta, 19 minit bad 33 sekhon.
Ha kane ka jingïakop ki la don haduh hynriew ngut ki longkmie kiba la kumba 70 snem ka rta shaneng kiba la ïashim bynta ha katei ka jingïakop mareh kaba 21km, ha kaba i Kong Kmoiñ I la lah ban tam haduh 8 minit ïa ka Anjali Mondal (2:28:06), kaba la wan ba-ar.
Da ka jinglah ban pyndep ïa kane ka jingïamareh, I Kong Wahlang I la pyndep ruh ïa ka ‘Procam Slam’ jong ki saw tylli ki jingïamareh ha kylleng ka ri India ba la pynlong da ka Procam, kiwei pat ki long ka World 25K ha Kolkata, Mumbai Marathon bad ka World 10K ha Bengaluru.
Ha kawei pat ka liang u nongïalehkai ka Jylla u Kresstarjune Pathaw u la wan ha ka kyrdan ba shiphew ha ka Elite Men’s Half Marathon (Indian male). Une u rangïalehkai u la lah ban pyndep ha ki 1 kynta, 8 minit bad 11 sekhon, ha kaba u la duna da 50 sekhon ïa u nongmareh uba la wan ha ka kyrdan ba khyndai.
Napdeng ki nongïalehkai ka India, la khur jingjop da u Shailesh Kushwaha (1:05:05), uba la tam da 3 minit bad 6 sekhon ïa u Kresstarjune.
Ïa ka nam nongjop ha kane ka Delhi Half Marathon la ïoh da u Charles Mbatha Matata uba na Kenya, uba la lah ban pyndep ha ki 58 minit bad 52 sekhon. Katba ïa ka kyrdan ba-ar bad balai la ïoh da u Samwel Nyamai Mailu (0:59:24) bad u Stanley Waithaka Mburu (0:59:33).
Haba phai sha ka liang ki kynthei, ïa ka nam nongjop la khur da ka Wudinesh Alemu Keneni na Ethiopia kaba la lah ba pyndep ha ki 1 kynta, 6 minit bad 35 sekhon. Katba ïa ka kyrdan ba-ar bad balai la khur da ka Selah Jepleting Busienei (1:07:01) bad ka Cynthia Chelangat Chepkwony (1:07:32), kiba na Kenya.
