Shillong, Risaw 19
Ka Mawkhar SC ka la long ka lahduh ha ka lympung ïalehkai First Division Football League ba la pynïaid da ka Shillong Sports Association, hadien ba ka la lah ban pynliem noh ïa ka Nongkrem SC lyngba ka tie-breaker da 4-3 kol ha ka lah sngi U Blei ha SSA Stadium, Polo.
Kane ka jingïalehkai phainal ka la long kaba itynnad bad kaba ïakhaid bha ha ka rukom ïalehkai ha kaba ym don ba lah ban thep kol haduh kaba kut ki 120 minit.
Te kumta ban rai ïa ka nam jop, ka Mawkhar ka la lah ban thep ha ka tie-breaker da 4-3 kol ïa ka liang pyrshah na ka bynta ban khur syndon ïa ka nam lahduh. Te kumta ka Mawkhar ka la ïohpdiang ïa ka khusnam pisa kaba T.2 lak bad ka Nongkrem ka la ïoh T. 1 lak.
Lah ban kdew kine baroh ar tylli ki kynhun ki la kiew kyrdan sha ka Shillong Premiere League ha kaba kin ïoh ban shim bynta ha u snem ban wan.
Kumba ka paw kane ka long hadien hynñiew snem ïa ka Mawkhar ba kan wanphai biang sha ka SPL naduh ba ka la ïalehkai khatduh ha u snem 2019, katba kan dei hadien 11 snem ba ka Nongkrem kan wanphai biang sha katei ka lympung naduh ba la ïalehkai khatduh ha u snem 2016.
