Bhubaneswar, Risaw:
Ka jingkhang ban pyndonkam ïa ki bom pataka bad ki jingtem DJ kin sa ïai bteng ha ka nongbah jong ka jylla ha kine ki por ba rakhe ïa ka Durga Puja ka ban long ha ka 22 tarik u Risaw. U DCP jong ka nongbah u Saravana Vivek M u la ong ba ka jingpynngam blei ha um kan sa long ha ka 22 tarik Risaw hadien ba la dep ban rakhe ïa ka Dussehra ha ka 21 tarik, Risaw.
U Saravana u la ong ba la thaw ïa ki pung ba shipor ha ki jaka bapher bapher ha kylleng ka wah Kuakhai bad Daya ha kaba yn pynlong ïa ka jingpynngam blei thaw. La shah ïa ki tiar tynrai bad ka kynhun tem ha ka por ba pynlong ïa ka jingleit pynngam. Hynrei kan don ka jingkhang ban pyndonkam DJ, u la ong.
La pynjari ruh ïa ka jingkhang ban pyndonkam ïa ki bom pataka ha ka por ba ïaid proseshon Bhasani, la ong ki nongpynïaid ha Saheed Nagar.
Ka jingpynngam um kan sdang ha ka por shiteng sngi bad kan bteng haduh ban da miet. Ïa kane ka jingïaid proseshon yn pynlong da ki kynhun da ki saw tylli ki seng, ka Bhubaneswar Bhasani Utsav Samiti, Saheed Nagar; Rajdhani Mandir Suraksha Bhasani Samiti, Nayapalli; Uttar Bhubaneswar Bhasani Committee, Chandrasekharpur; bad Old Town Bhasani Samiti.
“Hadien ba baroh ki komiti puja ki la ïa lum lang hajan madan Rupali, yn pynlong ïa ka jingïaid kjat kaba heh jong ki bleithaw jong ka blei kmie ha ka por kumba 4 baje eiei. Ka jingïaid kjat kan kut ha madan Raj Mahal hadien kata ki nongpynïaid puja kin ïakhlad noh ban pynngam um,” ong u General Secretary ka Samiti u Harish Prasad Rath.
Ki la don kumba 26 tylli ki puja committee kiba heh kiba kynthup ïa ka Palasuni, Bomikhal, Jharpada, Saheed Nagar, Cuttack Road bad Old Station Bazaar kin ïadon bynta ha kane ka jingleit pynngam um ha surok Janpath ban pynlong da ka Bhubaneswar Bhasani Utsav Samiti.
U Rath u la ong ba da kaba pyrkhat ïa ka jingkhang ban pyndonkam ïa ki jingrwai DJ bad ki jingpynbthei ïa ki bom pataka, ki la rai ban jied ïa ki jingrwai bad shad tynrai ban pynneh ïa ka bor jong ka jinglehkmen.
Ki dkhot jong ka Bhasani Samiti jong ka Nayapalli ki la ïathuh ba kumba 18 haduh 20 ngut ki nongpynïaid puja kin ïadon bynta lang bad ki na ka bynta ka jingleit pynngam um, ka ban pynlong katkum ki kyndon ba la pynmih da ka bor synshar.
Yn pynjari ruh ïa ki jingkhang ïaid kali ha ki jaka ba la buh kyrpang ha kaba yn pynlong ïa ka jingleit jingwan da ki nongpynïaid ha katei ka sngi. Ki nongpynïaid kiba kwah ban pynlong ïa ka jingleit pynngam ha kano kano ka sngi kin hap ban pan jingbit na ka bor ba dei peit, la ong u DCP.
