Bengaluru, Risaw:
Ka jingktah jong ka jingkyrduh um ha Karnataka ka kham jur bad kham buh jingkhuslai ban ïa kaba ïohi kumba ka paw.
Katba ka jingpyrkhat ka la long kham bunsien halor ka jingktah jur jong ka jingkyrduh um ïa ki nongrep, ka jingbishar bniah jong ki riew shemphang ka la pynpaw ba ka don ka jingktah kaba kham sniew ha ki mrad bad ki syiar , la shim ba ka long kum ka jingïada na ka bynta ki nongrep ha kaba shim ïa ki jingduhnong bad jingeh.
Kane ka jingpynpaw ka la pynlong ïa ki riew shemphang na ka ICAR-National Institute of Animal Nutrition and Physiology (NIANP) kaba don ha Bengaluru ban pynjur ïa ka jingtrei halor ka jingpynbeit ïa ki bynta jong ka jingbam hapdeng ki mrad ba ri bad ki syiar ha kylleng ka Karnataka.
Ka jingpeit bniah da ki stad saïan jong ka ICAR-NIANP ha ki 226 na ki 240 tylli ki thaiñ ka la lap ba ka jinglong jingman jong ka jingkyrduh um kaba la don lypa ka la pynlong ïa ka jingduna um, ka jingeh ha ka jingshit, ka jingduna bam bad ka jingkyrduh bam, ka jingbam bym thikna, bad ka jingma jong ki jingpang hapdeng ki mrad bad ki syiar.
Ha ka por ba bishar bniah, ki nongwad bniah ki lap ba ka jingkyrduh ka ktah ïa ka jinglong jong ka dud, kaba pynlong ïa ka jingduna ha ka jingdon jong ka shini kaba khlaiñ bad ka jingdon jong ki vitamin. Ki la ïohi ïa ka jinghiar ki rukom treikam jong ki jingbam khlaiñ kiba mih na ka khyndew, kaba ha kajuh ka por ka pyni ïa ka jinghiar ha ka jinglong jong ki jingbam, kaba ktah ïa ka jingbam na ka bynta ki jingri. Na ka bynta ki syiar, ka jingbam kum ki pylleng ki la duna ka bor treikam khamtam ha ka Protein.
Ka jingbym biang ka bam hapdeng ki mrad ka la pynkiew ruh ïa ka jingeh jong ki, kaba la ktah ïa ka jingmih jong ki, la ong ki stad saïan. Ka jingbym biang jong ki jingbam ka la ktah ïa ka jingkhia jong ki langbrot bad ki blang, kaba la ktah ïa ka jingdap doh, kawei pat ka jingkit kaba khia ha ka ïoh ka kot na ka bynta ki nongrep.
Katba ki mrad ki long kum ka jingïada ba nyngkong eh na ka bynta ki nongrep ha kane ka por ba dang shah ktah ha ka jingrang tyrkhong, mynta la sngew ïa ka jingktah, bad ki stad saïan jong ka ICAR-NIANP ki dang ïaleh ban weng ïa kane ka jingeh. U Dr Artabandhu Sahoo, Director ka ICAR-NIANP u la ong, “Ïa ki jingbam ba tei met la pynkhreh katkum ka jingdawa jong ki jaka.”
Ki stad saïan ki dang ïatreilang bad ki nongrep ban sngewthuh ïa ki jingdonkam jong ki, katba ki dang thaw bad pynbiang ïa ki jingbam ba kongsan na ka bynta ki mrad ban ïarap ban weng ïa ki jingeh kiba bun jait, kynthup ïa ka jingbam, ka jingkoit jingkhiah jong ka kpoh, ka jingpynkha khun, ka jingpynriewspah ïa ki vitamin bad ka jingmih jong ki lyer jakhlia.
U Sahoo u la ong ba ka jingdawa ka nang kiew ha ka kam ri syiar bad suki suki ka nang kiew na ka bynta ka kam dud, ruh. Haduh mynta, la thaw ym duna ïa ka 30 tylli ki jingbam ba pyndap, ha kaba 10 tylli la pynïaid ïew.
