Shillong, Risaw 22
Ka Nongkseh Sport & Cultural Club ka la khur ïa ka jingjop ha kaba sdang ïa ka jingïalehkai jong ka Group-C ha ka I-League 3, hadien ba ka la pynliem noh ïa ka Kuppuraj FC na Puducherry da 4-1 kol ha ka sngi Palei ha SSA Stadium, Polo.
U Owanijuh Pajuh u la pynkhih jar nyngkong eh ha ka minit kaba 38 hashwa ba u kapten ka kynhun u Hardy Cliff Nongbri un thep ar kol ha ka minit kaba 50 & 55. Ïa ka kol kaba saw bad kaba khatduh la thep da u rangïalehkai ba dangshu soi thymmai u Ieitlang Syiemlieh (58). Hynrei u Jaymz Bryan Pale u la lah ban pynphai kylla shi kol na ka bynta ka Kuppuraj ha ka minit kaba 88.
Ha kane ka jingïakhun baroh ar ki kynhun ki la pyrshang ban ïakhuh tyngeh ha kaba ki la ïoh ïa ki kabu kiba biang ban thep kol. Ka Nongkseh ka la long ba la pynkhreh bha na ka bynta kane ka jingïakhun ha kaba ka la pyrshang ban thom naphang bad ban pyrshang ban ïoh thep kol, hynrei u rangapkol ka Kuppuraj u la lah ban khanglad na ka jingshah thep.
U Hardy uba la ïalam ïa ka kynhun, u la ïoh ïa ka kabu kaba biang ha ka minit kaba 32 lyngba ka corner, hynrei u Kynsailang um shym la lah ban pynurlong.
Dei ha ka minit kaba 38 ba katei ka kynhun kaba la rah dangshen ïa ka Super Cup, ka la ïoh ban pynkhih jar hadien ka jingïarap pynbuh bol da u Kynsailang bad u rangïalehkai ka Nongkseh uba dangshu pynïasoh thymmai u Owanijuh Pajuh, u la lah ban thep ïa katei ka kabu ksiar.
Hadien katto katne por ki rangïalehkai ka Kuppu-raj ki la pyrshang ban pynphai, hynrei kim shym la lah ban pynurlong na ka daw ka jingïashan tyngeh ki rangïalehkai ‘dien ka Nongkseh. Haduh kaba kut jong ka kylla step ka Nong-kseh ka dangtam da 1-0 kol ïa ka liang pyrshah.
Hadien san minit ba la bteng ïa ka jingïalehkai jong ka kylla miet ba ka Nongkseh ka la ïoh ban thep kol biang lyngba u Hardy. Kine ki ar kol ki la buh jingeh ïa ka Kuppuraj bad ha ka minit kaba 55 u kapten ka Nongkseh u la la ïoh ban thep biang sa shi kol na ka bynta ban tam da 3-0 kol.
Hadien lai minit ka Nongkseh ka la ïoh ban thep biang sa shi kol lyngba u Ieitlang. Kine ki saw kol ki la nangbuh jingeh shuh shuh ïa ka Kuppuraj ha kaba ka la shem shitom ban pynphai.
Hadien kine ki saw kol, ka Nongkseh ka la kylliang noh haduh san ngut ki rangïalehkai na ka bynta ban ailad ïa kiba shongben ba kin mih madan. U Shano Tariang u la pyrshang ban thep kol, hynrei u rangapkol ka Kuppuraj u la lah ban pyllait na ka jingshah thep.
Na ka daw ka jingbym lah ban teh lakam ki rangïalehkai dien’ ka Nongkseh, kaba la pynlong ïa ka Kuppuraj ba kan pynphai kylla shi kol hashwa ban wai lyngba u Pale, hashwa ba kan mad ïa ka jingshah rem.
Ka Nongkseh kan pynkhreh ïa kawei pat ka jingïakhun ha ka sngi Saitjaiñ (24 tarik) pyrshah ïa ka Chhaygaon FC ha ka por 5 baje janmiet.
Haba phai sha kawei pat ka jingïalehkai kham hashwa jong kane ka group, ka Godavari FC ïa ka Lakecity FC da 5-3 kol.
