Tibet, Risaw:
Ki bor pyniaid ka Tibet ki la iathuh ba 18 ngut ki lanot ki la duh ei noh ïa la ka jingim bad da ki phew ngut kiwei pat ki la mynsaw ha ka jingkhynñiuh u jumai uba jur kumba 7.0 Magnitude ka jingkhlaiñ hapoh Tibet ha ka Sngi Palei. Utei u jumai u la khynñiuh ha ka por 10:33 baje mynstep (1433 GMT) bad ka phang pdeng ba utei u jumai u kham ai eh, ka long ha ki bynta lum kiba jngai kumba 190 kilomitar (120 mile) na ka phang Shatei Lam Mihngi jong ka Nagqu bad 390 kilomitar na ka phang Shatei Lam Mihngi na ka nongbah jong ka thaiñ Lhasa, ong ka US Geological Survey.
Ka China Central Television (CCTV), da kaba kdew na ki heh sorkar jong katei ka thain, ka la buh ïa ka jingdon jong kiba mynsaw haduh 46 ngut ha kaba 11 ngut na kitei ki mynsaw jur bha, ha kaba 339 tylli ki iing ki la twa lane ki la shah pynjulor.
Ha ka jingjurip ba nyngkong la lap ba ki don 339 tylli ki iing kiba la twa, bad la phah palat 300 ngut ki pulit ban iarap ha ka jingpyllait im kaba dang iaid shakhmat.
Ki video ba la pynmih online ki pyni ïa ki nongtrei ba ki phet krad na ki jaka bam bad ki tiar ki hap na ki shelf ha ki dukan heh ha ka por ba u jumai u la jia.
Ha u Kyllalyngkot 2025, ym duna ïa ka 126 ngut ki briew, ki la iap ha ka jingtwa khyndew ha ka thain nongkyndong jong ka Tibet, Tingri county.
Kitei ki jingkhynñiuh jumai ki la jia hadien katto katne taiew ba la jia ka jingshlei um kaba la pynïap ïa palat 1,400 ngut ki briew ha ka thaiñ khappud ka Nepal bad ka Tibet ha u Naiwieng. Kane ka jingshlei um kaba shyrkhei ka la sdang najan khappud Nepal-Tibet bad ka la rong noh ïa ki ïing ki sem bad ki jingtei ha ki bynta ba shatei bad pdeng jong ka Nepal.
Ha kajuh ka por, sa uwei pat u jumai uba bor 5.2 magnitude u la lynshop ha China ha ka por 8.29 baje mynmiet (IST), kumba 505 km shaphang shathie shatei lam mihngi na Arunachal Pradesh Pangin ha ka jingjylliew kaba 15 km, ong ka NCS.
