Serbia, Risaw:
Da ki phew hajar ngut ki nongkyrshan jong ka seng samla pule jong ka liang pyrshah jong ka Serbia, ki la ïalum lang ha pdeng jong ka nongbah Belgrade, ha ka sngi Thohdieng, ha ka por ba u nongïalam ba la slem jong katei ka ri, u Aleksandar Vucic, u dang ïalum lang ha kylleng ka nongbah, ha ka jingïakhun ba khatduh, ha shwa ka elekshon parliament, kaba kongsan bha.
Ka Student List, kaba dei ka seng khlem nongïalam jong ki kyrtong ba la kyrshan da ki samla pule, ka thmu ban pynkut noh ïa ka jingsynshar palat 14 snem jong ka Serbian Progressive Party (SNS) jong u Vucic, kaba don ha ka liang ka diang jong ki paidbah, haba ka ri kan thep vote ha ka Sngi U Blei.
Ka dei ka jingma kaba khraw tam kaba u Vucic u la mad ha ka jingbat jong u ïa ka bor synshar, bad ki seng bhalang ki la maham ba ka jingïakhih elekshon ka la shah pynsniew ha ka jingpyntieng, ka jingshah kem, ka jingshah thombor, ka jingpyndonkam bakla ïa ki marpoh khyndew paidbah bad ka jinglong jingman jong ki lad pathai khubor kaba la pynkylla khongpong.
“Nga la wan ban kyrshan ïa ka Student List namar ki samla ha kaba kut ki la ai jingkyrmen ïa nga ba ka long kaba lah ban im ha ka ri kaba thikna”, la ong ka Marija Nedeljkovic Radic, kaba 47 snem ka rta, ha ka AFP, haba ka dang poi sha katei ka jingïalang jong ki samla pule.
“Shisha, ha ka sien kaba nyngkong ha ka jingim jong nga, nga ngeit ba ka long kaba lah.”
Kane ka jingthep vote ka wan hadien ba la jan ar snem ka jingïakhih ba la ïalam da ki samla pule kaba la mih na ka jingtwa jong ka tnum ha ka steshon rel Novi Sad kaba la pynthymmai thymmai ha u snem 2024 kaba la pynïap ïa 16 ngut ki briew.
Kane ka jingjia ba sngewsih, kaba la kynnoh pathar ba ka dei ka bamsap, ka la pynmih ïa ki katto katne ki jingïakhih kiba heh tam jong ka Serbia, naduh ba la hap noh u riew khlaiñ bor, u Slobodan Milosevic, ha u snem 2000.
Ka jingïakhih pyrshah bamsap, kaba la ïalam da ki samla pule ha ka skulbah, ka la nang kiew stet na ki jingdawa ban don ka jingtohkit kaba shai halor katei ka jingjia ba sngewsih haduh ka jingkhot ban pynlong ïa ka elekshon kloi.
Da kaba pynher ïa ki lama “Ki samla pule ki jop”, ki rwai, bad ki pyrta ïa ki jingsawa, ki samla pule ki la iaid lyngba ïa ka Belgrade shwa ban ïa lum lang ha madan Slavija, ka jaka jong ki katto katne ki jingiakhih kiba heh tam jong ki.
Haduh ka por janmiet, da ki hajar ngut ki la poi, bad ki paidbah ki dang nang bun.
