Shillong, Risaw 26
Ka Lakecity FC ka la pynliem noh ïa ka Chhaygaon FC na Assam da 2-1 bad ka Godavari FC ka la jop 5-1 kol ïa ka Kuppuraj FC ha ki jingïalehkai ka Group-C jong ka lympung ïalehkai I-League 3 2026-27, ha ka lah sngi U Blei.
Ha kane ka jingïakhun kaba la long ha SSA Stadium ha Polo baroh ar ki kynhun ka Lakecity bad ka Chhaygaon ki la pyrshah ban ïalehkai bha, hynrei kim shym la lah ban thep kol ha ka kylla step. Dei hadien saw minit ba la bteng ïa ka kylla miet ba u Rohan Manar u la ïoh ban pynkhih jar na ka bynta ka Chhaygaon lyngba ka penalty.
Hadien katto katne por ka Lakecity kaba na Madhya Pradesh ka la pyrshang ban ïakhun tyngeh ha kaba ka la pynphai kylla shi kol lyngba u Gagandeep Singh (71). Kane ka kynhun ka la thep biang sa shi kol lyngba u Abhijit Tawhare (87) na ka bynta ban khur syndon ïa ka jingjop.
Kane ka long ka jingjop kaba ar na ka bynta ka Lakecity bad ha ka jingïalehkai ba nyngkong ka la shah rem ha ka Godavari, katba ka Chhaygaon ka dangmad ïa ki ar tylli ki jingshah rem bad ha ka jingïalehkai ba la lah ka la shah rem da 4-0 kol ha ka Nongkseh.
Haba phai sha kawei pat ka jingïalehkai, ka Godavari ka la thep nyngkong ar kol lyngba u Yhoto Lohe (22 & 30) hashwa ba kan thep biang sa ar kol lyngba u Syed Suhail Pasha (35 & 65). Kane ka klob kaba na Andhra Pradesh ka la thep biang sa shi kol lyngba u Kamgouthang Thomsong (82) na ka daw ka jingbakla u rangïaleh-kai ka Kuppuraj u Khangmiki Pale. Hashwa ban wai katei ka klob kaba na Pondicherry ka la lah ban pynphai kylla shi kol lyngba u Sangti Janai Shianglong (90?) hashwa ba kan mad ïa ka jingshah rem.
Kumba ka long mynta ka Nongkseh, Godavari bad ka Lakecity ki la kamai mar 6 poiñ, hynrei katei ka klob na ka Jylla ka la tam lyngba ka jingïapher ha ka jingthep kol (+7, +6 bad +1).
Kane ka lympung kan bteng biang ha ka sngi Balang ha kaba ka Chhaygaon kan ïakynduh pyrshah ïa ka Godavari ha ka por 9 baje mynstep bad ka Nongkseh ïa ka Lakecity ha ka por 5 baje janmiet.
