Shillong, Risaw 27
U rangïalehkai Bayern Munich u Harry Kane u la khur ïa ka khusnam Ballon d’Or 2026 na ka bynta ban pynkut ïa ka jingap khmih lynti ki nongïalehkai na England haduh 25 snem ban khur ïa kane ka khusnam kaba kyrpang.
U Kane u la pynlut por da ki snem ban ïohpdiang ïa katei ka khusnam kaba heh tam ha ka jingïalehkai phutbol. Une u rangïaleh-kai u la thep 73 kol na ka bynta ka klob bad 91 kol na ka bynta ka England ha ki 125 tylli ki jingïalehkai bar ri.
Te kumta utei u rang-ïalehkai shakhmat uba na Leytonstone u la long uba san na ki nongïalehkai ka England ban khur ïa ka khusnam Ballon d’Or, hadien u Sir Stanley Matthews ha u 1956, Sir Bobby Charlton ha u 1966, Kevin Keegan ha u 1978 bad 1979, bad u Michael Owen ha u 2001.
Ka jingshah jied kaba hynñiew jong u Kane sha ka Ballon d’Or ka la paw ba ka dei ka jingpynbyrngia, ha kaba une u rangïalehkai ka Bayern Munich u la ïoh khatduh ïa ka khusnam kaba la thrang hadien ba u la shah kyntait da ki snem hapdeng ka jingbym don ki khusnam ba heh jong ki kynhun. Ka jingjop jong u ka la pynkut noh ïa ka jingkhmih lynti jong ka England kaba la 25 snem ban ïoh ïa u nongjop bad pynlong ïa u kum u rangïalehkai ba nyngkong eh ban ïoh lum ïa ka khusnam kum u rangïalehkai ka Bayern Munich.
U Matthews u dei u nongjop ba nyngkong eh ha ka por ba la pyntreikam ïa kane ka khusnam ha u snem 1956, katba u Keegan pat u danglong tang ma u hi u nong England uba la jop arsien ïa kane ka khusnam. Kham hashwa u Keegan u la bat ïa ka nam kum u nongjop ba marwei na England uba ïalehkai na ka bynta ka klob bar ri, hadien ba u la ïoh lum ïa baroh ar tylli ki khusnam katba u dangmihkhmat ïa ka Hamburg ha Germany.
Ka jingjop u Kane mynta u snem ka dei hadien ka samoi ba u la thep 73 kol ha ki 65 tylli ki jingïakhun na ka bynta ka Bayern bad ka England, ryngkat bad 8 tylli ki jingïarap pynbuh bol.
U Kane u la ïasoh lang bad ka Alexia Putellas, kaba la jop ïa ka Ballon d’Or Féminin 2026. Kane ka nongïalehkai ba paw jong ka Barcelona ka la ïoh ïa katei ka khusnam jong ki kynthei ha ka sien kaba lai, hadien ka jingjop jong ka ha u snem 2021 bad 2022.
