Shillong, Risaw 27
Ki shiphew tylli ki kynhun ïalehkai phutbol ki la long ba la pynkhreh ban ïashim bynta ha ka Champions Cup 2026 ban pynlong da ka Shillong Sports Association, kaba la buh ban sdang naduh ka 3 tarik u Naiwieng ha SSA Stadium, Polo.
Kine ki kynthup ïa ka Mawlai SC kaba long ka lahduh jong ka Shillong Premier League, kumjuh ka Nongkrem kaba wan ba-ar ha ka First Division, ka Mawpat kaba long ka lahduh ha ka Second Division, ka Lamlynti SC kaba la wan ba-ar ha ka Third Division lem bad ka Mawpdang SC kaba long ka lahduh ha ka Fourth Division, kiba don ha ka Group-A. Katba ha ka Group-B ki long ka Shillong Lajong FC kaba la wan ba-ar ha ka SPL, kumjuh ka Mawkhar SC kaba long ka lahduh ha ka First Division, Sohryngkham SC kaba la wan ba-ar ha ka Second Division, Sanmer SC kaba long ka lahduh ha ka Third Division lem bad ka Seila Sap SCC kaba la wan ba-ar ha ka Fourth Division.
Watla ka Mawlai ka la long ka lahduh ha ka SPL mynta u snem, hynrei ka kwah ban ïakynduh final pyrshah ïa ka Shillong Lajong. “Kum ka lahduh ha ka SPL, ngi kwah ban ïakynduh final pyrshah ïa ka kynhun ba khlaiñ bor kum ka Shillong Lajong,” la pynpaw u Manager ka Mawlai SC u Bah Teibor Dohling ha ka jingïakren bad ki nongthoh khubor.
“Kan long kaba kham itynnad lada ki kynhun ba khlaiñ bor kin ïakynduh ha ka final bad kumjuh ïa ki paidbah nongpeitkai,” la pynpaw u Manager ka Shillong Lajong u Henry Marboh.
Na ka liang ka liang ka SSA ka la ailad ïa ki kynhun ïalehkai naduh ka First, Second, Third bad Fourth Division ba kin shim wai (loan) mar 5 ngut ki rangïalehkai, te kumta kine ki kynhun ki la pyndep la ka bynta ban pynkhreh ïa la ki jong ki kynhun bad ki la pynpaw ba ki la pynkhreh ban ïalehkai bha khamtam leilei haba kin ïakynduh ïa ki kynhun ba khlaiñ bor jong ka SPL kum ka Mawlai bad ka Shillong Lajong.
Ïa kane ka lympung yn sdang naduh 3 tarik u Naiwieng hapdeng ka Mawlai SC pyrshah ïa ka Lamlynti SC ha ka por 2:30 nohphai sngi ha SSA Stadium.
