Bteng ka Meghalaya ïa ka jingjop kaba ar ha ka Senior Women’s T20

Shillong, Risaw 29

Ka Meghalaya ka la pynliem noh ïa ka Manipur da 3 run na ka bynta ban khur ïa ka jingjop kaba ar ha ka lympung ïalehkai Senior Women’s T20 Trophy 2026-27 (plate group) kaba la long ha ka sngi Palei ha Sovima, Nagaland.

Ha kane ka jingïakhun ka Meghalaya ka la kam trai ban tied nyngkong hadien ba ka la jop ïa ka kynting pisa, ha kaba ka la kamai 103/5, hynrei ka la lah ban khanglad ïa ka Manipur ba kan kamai tang 100/9 ha ki 20 over.

Ha ka lah sngi U Blei ka Meghalaya ka la pynliem ïa ka Arunachal Pradesh hashwa ba kan shah rem ha ka Bihar ha ka sngi Ba-ar.

Ha ka jingshisha ka Manipur ka la ïalehkai bha ha ka jingkawang bol ha kaba ka Meghalaya ka la ïoh tang 37/4 ha ki 9 over, hynrei ki lai ngut ki nongtied kiba kynthup ïa ka Neha Hajong (24), Daïaka Warjri (29 not out) bad ka Inda Kharwanniang (21 not out) ki la lah ban ïalehkai na ka bynta ka Meghalaya.

Ha kane ka pali tied ka Neha ka la shimpor haduh 35 bol ba kan kynjoh sha ki 24 run. Hapor ba ka la shah pynkhyllem ka Meghalaya ka la ïoh 60/5 ha ki 15 over. Hynrei ka Daïaka bad ka Inda ki la ïakhun tyngeh na ka bynta ban kynjoh sha ki 43 run watla dangsah sa 5 over. Te kumta ka Daïaka ka la long ka nongtied kaba khlem shah pynkhyllem na ka bynta ba kan kamai 29 run ki 27 bol bad ka Inda ka la ïoh 21 run na ki 16 bol.

Haba ban beh ïa ka thong, ka Loidangton Thokchom ka la lah ban tied 37 run na ki 46 bol, hynrei ki nongkawang bol ka Meghalaya ka la ïalehkai bha ban pynhap wiket ïa ki nongtied ka liang pyrshah.

Ka Debasmita Dutta ka la long ka nongkawang bol kaba kynsai na ka bynta ban khur 2/12 bad ka Ajima Sangma ka la ïoh 2/17. Kumjuh ka Neha ka la ïoh 1/11 bad ka la ïoh ruh ïa ka nam Player of the Match.

Te kumta ka Meghalaya kan pynkhreh ïa ka jingïakhun ka ban wan pyrshah ïa ka Nagaland ha ka sngi Saitjaiñ.