Shillong, Risaw 29
Ka Jakrem Sports Club ka la jam sha ka wat kaba khatduh (final round) jong ka Indian Women’s Lea-gue 2, hadien ba ka la pynliem noh ïa ka Mumbai Knights FC da 3-0 kol ha ka sngi Palei ha SSA Stadium, Polo.
Kane ka nam jop ka la wan urlong lyngba ka Bahunlang Synrem (40′), Ïaphisha Marbaniang (60′) bad ka Marbarin Nongrum (67′) na ka bynta ban pynlong ïa ka Jakrem ban bat ïa ka kyrdan ba hakhlieh ha ka Group-C da kaba kamai 9 poiñ ha ki lai sien ïakhun.
Kane ka kynhun kaba na South West Khasi Hills ka la long kaba khlem shah rem naduh kaba sdang kane ka lympung ha kaba ka la khur jingjop ruh ha ki jingïalehkai ba la lah pyrshah ïa ka AIFF TDS Academy da 2-1 kol bad ïa ka Kemp FC da 3-2 kol.
Haba phai sha kane ka jingïalehkai kaba khatduh, baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol. Hashwa ban kut ka jingïalehkai jong ka kylla step ba ka Jakrem ka la ïoh ban pynkhih jar nyngkong eh lyngba ka Bahunlang ha ka minit kaba 40.
Kane ka kynhun hapoh ka jingïalam u Bah Janbor Marbaniang (coach) ka la thep biang sa ar kol ha ka kylla miet lyngba ka Ïaphisha (60′) bad ka Marbarin Nongrum (67′) na ka bynta ban khur syndon ïa ka jingjop.
Nalor ka Jakrem kaba la ïoh ban lamkhmat ha kane ka group, ka Kemp FC ka la wan ba-ar da kaba kamai 6 poiñ, katba ka AIFF FIFA Talent Academy bad ka Mumbai Knights ki la kamai ïoh mar 1 poiñ.
