Nongstoiñ, Risaw 29
Ka Nongstoiñ District Sports Association (NDSA) ka la rai ban pynlong ïa ka jingïalang paidbah (general meeting) ha ka 16 tarik u Naiwieng mynta u snem na ka bynta ban jied ïa ki nongkitkam kiba thymmai.
Ïa kane ka rai la shim ha ka jingïalang ki dkhot jong ka Council kaba la long ha ka sngi Palei ha Nongstoiñ.
Kumba ka paw katei ka synjuk kam shym la lah ban pynlong ïa ki lympung ïalehkai phutbol mynta la ar snem kynthih kata ha snem 2025 bad 2026 naduh ka Super, First, Second bad ka Third Division. Kane ka jingbym shim khia da katei ka synjuk ka la wanrah ka jingduhnong kaba khraw ïa ki nongïalehkai ka thaiñ West Khasi Hills hi baroh kawei.
Haba ïakren bad u nongthoh khubor, u President ka NDSA u Bah B.S. Kharlor u la ong ba katei ka jingïalang jong ka council ka la ïakren halor ka jingkheiñ jingdiah ïa kaba ka NDSA ka la pyndonkam ïa ki jinglut jingsep jong ka samoi treikam jong ka.
“Kane ka jingïalang ka la rai ruh ban pynlong ïa ka general meeting ha ka 16 tarik u Naiwieng na ka bynta ban pynthymmai ïa ki nongkitkam.”
U la ïathuh ruh ba katei ka jingïalang, ka la don ruh ka jingïakren ban pynlong ïa ki lympung ïalehkai.
