Shisha ha ka jinglong briew jongngi ngim lah ban kiar na ki kam sniew kam smeh. Namar ngi dang dih kiad dih drok bad ïoh kiei kiei ki jingleh kiba ktah ïa ka bor met bor phad jongngi. Ha kajuh ka por ngi dang mlien ban kren sih kren sang bad tim sih tim sang ïa ki lok ki jor bad ïa ki para briew.
Kane ka jingmlien ban tim sih ïa ki para briew ka long ka jinglong kaba sngew khraw, sngew meng bad sngew – hangamei bad sngew hok palat ba ïa kiwei. Ka kren sih kren sang kam dei kaba don burom donakor ka long ka jingkren dait buit ïa kiwei bad ñiewpoh ïa ki para briew. Ka jingkren sih kren sang ka long ka jingkren kaba pynmong bad pynsngewsih ïa ki para briew. Ka kren sih kren sang ka pynpohdor ïa ka longbriew manbriew bad ka pynhiar dor ïa ka imlang ka sahlang, Ka long kumjuh kiba kyrni dih kiad bad dih drok, ki leh ïa kaei kaei kaba bha hapdeng ki para briew. Ka dih kiad dih drok ka pynjot ym tang ïa ka ïing ka sem bad ïa ki para briew hynrei ka pynjot ïa kita kiba dih mutlop ïa ka. U Isaiah u ong, Kordit ïa kita kiba shait ban dih wain bad kiba khlaiñ ban pynkhleh kiad (Isaiah 5 : 22).
Ka ong ruh ka wain ka long ka nongïamai uba bakla na ka um long uba stad (Proverb). Kumta kiba dih kiad dih drok bad kiba kren sih kren sang ki wan na kajuh ka tlongum ka bym lah ban ioh ka burom. Kane ka tim sih tim sang ka wan na ka jingmlien kaba don hapoh ka mynsiem u briew bad ka long ruh ka jingpynkheiñ ïa ka hok longbriew manbriew. Kumta kane ka kren sih kren sang ka long kaba sniew haduh katta katta ka lah ban tam ka jingioh mar ïa ka kiad bad u drok.
Ban bynrap shuh shuh halor kane ka timsih timsang ka long ka kyntien kaba pynthang bad pynsniew dur ha ka jngïadei para briew. Kumta to ngin kiar katba lah ban kren ki ktien khlem akor haba shit ka sngi.Namar ka pynjah burom ym tang ïa uba kren hynrei ïa baroh kiba iohsngew ïa kane ka jait jingkren ha khmat ki para briew.
C. B. Iawphniaw
