(Ka jingrakhe ïa Ka World Sunday School Day manla ka snem ha ka sngi u Trai kaba nyngkong jong u Naiwieng, mynta ka snem 2026 kan hap ha ka 1tarik u November)
TBn (Dr) S. P. Rngikseh
KA JINGLAMPHRANG
Haba ngi rakhe ïa kane ka sngi, kiba bun na ngi ki rangbah nongïalam bad ki kmie-ki-kpa ngi tharai ba kane ka dei tang ka sngi jong ki khynnah bad ki nonghikai Sunday School ne skul pynpaw. Hynrei ka jingshisha ka long, ka Sunday School kaba nyngkong eh ka sdang na ïing, bad ki nonghikai ba kongsan tam ki dei ma ngi ki kmie ki kpa.
Ki nonghikai Sunday School ki pynlut tang 1 kynta manla ka sngi u Blei ban hikai ïa ki khynnah. Hynrei ngi ki kmie ki kpa, ngi don bad ki 166 kynta man la ka taïew ha ïing.Ka ktien U Blei ha ka kitap Deuteronomi 6:6-7 ka ong, “Bad to ai ba kine ki ktien kiba nga hukum ïa me ha kane ka sngi kin ïai long ha ka dohnud jong me, bad men ïai hikai ïa ki ha la ki khun te men kren shaphang jong ki haba me shong ha la ïing bad haba me ïaid ha ka lynti,bad haba me thiah ruh bad haba me khie ruh.
KA MAT BA KONGSAN kaba nga wallam ha kane ka khubor ka long” Pynïeng ïa ka sawar U Blei ha ki longïing na ka bynta ka lawei jong ki khun”
Ngan pynïasoh ïa kane ka jingthoh kaba lyngkot- na ka Kitab u Amos 7:7-8 Shaphang ka jingkitkhlieh ka longïing. “Kumne ula pyni ha nga te…Bad u Trai u la ong ha nga, Ko Amos, me iohi aiu ? Te nga la ong, ka Sawar, ynda kumta u Trai u la ong ha khmih, ngan buh ïa ka sawar hapdeng ki Isreal u paidbah jong nga, ngan ym ïaid kiar ïa ki shuh”.U Nongïathuhlypa u Amos u wan ban pynkynmaw ïa ngi mynta ka snem halor ka jingkitkhlieh kaba ngi don ha la ki jong ki ïing ki sem.
U AMOS BAD KA “SAWAR” (THE PLUMB LINE)
Ha ka Bible Class jong ngi mynta ka snem, ngi pule ïa ka Kitab u Amos. Ha kane ka dkhot ba la kdew sha khmat, U Blei u pynieng ïa kawei ka tiar hakhmat u Amos bad kata ka dei ka SAWAR (Plumb line).
Kaei kane ka Sawar?
Ka Sawar ka dei ka tiar kaba ki misteri tei ïing ki pyndonkam ban pynthikna ba ka kynroh ka ïeng thik sak kam ju noh shiliang, lane kam ju kdor. U Blei u ïeng bad kane ka sawar ban check la ka jingim jong ki paidbah khristan bad ban thew ïa ka jingim jinglong jong ki longïing longsem la ki long kiba beit ne kiba kdor.
U Blei u la ong ha u Amos: “Ha khmih, nga pynieng ïa ka sawar hapdeng ki paid Israel jong nga” U Blei u da pynrem jur ïa ki Israel namar ha ïing-mane, ki don ka jingleh niam kaba phyrnai, ki rwai ki duwai. U Amos u ïohi ba ki Israel ki don ka jinglong riewkhraw niam bad kaba riewspah ha kaba shabar, hynrei ka dohnud bad ha ka jingim kaba shabar bad ha la ki ïing, ki long kiba kdor ka jingim kaba dap da ka jingshukor, ka jingbishni, ka jingsarong bad ka jingmatlah ha ka spah bad ka bor. Kane ka khubor kam kren tang ïa ka por ki khun Isreal, hynrei ka kren khamtam ïa ka por kaba ngi im mynta, kaba donkam ban pyrkhat marwei marwei.
KI KMIE KI KPA KI DEI KI MISTERI KIBA THAW ïA KA LAWEI JONG KI KHUN
Kum ki kmie-ki-kpa, ngi dei ki misteri kiba U Blei u la shañiah ban tei ïa ka jingim bad ka jingngeit jong ki khun.
Mynta ka juk kaba ngi im, ka pyrthei ka ring ïa ki khun ki kti jong ngi sha ka jingkdor. Ka Internet, ki smartphone, bad ki jingbieit jong kane ka pyrthei ki tei ïa ka kynroh kaba kdor ha ka dohnud jong ki khynnah. Lada ngi ïehnoh ïa ka jingpynsan ba kynja mynsiem tang ha ka Balang, ngi leh klet ïa ka hukum U Blei kum ki kmie ki kpa. Ka Sunday School kam lah ban maramot lane pynbeit ïa u khynnah lada ka nongrim ha iing ka kdor ! (ka long kumjuh ruh ïa ka imlang sahlang ïa ki khun samla jong ka jaitbynriew). Ki Kmie ki Kpa ki dei ki “Misteri” jong ka longing. Lada ka nongrim ha ïing ka kdor, ki nonghikai Sunday School kin shem shi-tom ban tei ïa ka ïing kaba beit ha ka shisngi u Blei. Ka Sunday School ka hikai 1kynta man ka taïew, hynrei ka dei ka kamram u kpa bad ka kmie ban pynbeit ïa ka lynti ïaid jong ki khun man la ka sngi.
Kum ki kmie-ki-kpa, ngi dei ki misteri kiba tei ïa ka ïing kaba kynja mynsiem jong ki khun. Ka pyrthei mynta ka ring ïa ki khun sha kaba kdor bad ka jingbakla. Ka kamram jong ngi ka long ban hikai bad ban ïalam ïa ka jingim jong ki khun sha ka jinglong riewblei sha ka jinglong tynrai ka jaitbynriew kaba tipbriew tipblei, tipkur tipkha bad kaba kamai ïa ka hok.
KA JINGKHMIH ïA LA KA LONGïING
Haba U Blei u thew ïa ka ïing jong ngi mynta ka sngi, u iohi ïa kaei? Kumno u shem ? ka beit ne ka kdor, kata kadei ka jubab jong ngi ha la marwei marwei. Hato ngi pynbiang tang ïa ka spah pyrthei, tang ïa ki ïing ki sem kiba rem dor, tang ïa ka riam ka beit ne tang ïa ki tiar, ïa ki Phone kiba rem dor, lane ka bam ka dih kaba kyrhai, katba ki khun pat ki thngan ïa kaba kynja mynsiem namar ngim ju hikai ïa ki ïa ka Ktien U Blei ha ïing? Ha ka dkhot 8:11 ka ong “Ha khmih, ki sngi kin wan, ong u Trai U Blei, bad ngan phah ka jingkyrduh ha ka ri, ym ka jingkyrduh kpu lymne ka jingsliang ïa ka um, hynrei ka jong kaba iohsngew ïa ka ktien u Trai.U Amos u maham shai ba ka jingdon spah khlem U Blei kan long kum ka jingkyrduh ïa kaba kynja mynsiem. Ki khun jong ngi mynta ki thngan ïa ka jingshisha namar ka Internet ka pyndap ïa ki da ki khubor lamler. Lada ngi ki kmie ki kpa ngim long ki nongbsa ïa ka ktien U Blei ha la ïing, ki khun kin ïaid wir ban wad ïa ka jingshai ha ki jaka kiba bakla. Ka khot ïa ngi ban ngin peit thuh ban bat bha ïa ka sawar kum ka tarajur kaba lah ban pynïeng beit khlem noh shilliang,khlem don jingkdor.
KA JINGKITKHLIEH U RANGBAH : Ka jingkitkhlieh ka pynmih ïa ka hok kaba pyntuid na ïing shabar. Ka dkhot kaba 5:24, ka ong “Hynrei to ai ba ka jingbishar kan tuid kum ki um bad ka hok kum ka wah kaba shlei”. U Amos u kyntu ïa ki khlieh jong ka imlang sahlang ban pyntuid ïa ka hok. Khamtam ïa ngi ki rangbah kiba long ki khlieh jong ki longïing longsem. Ki khun ki bud ïa kaei kaba ngi leh, ym ïa kaei kaba ngi bthah. Lada ngi long u kpa uba riam bha ha ïing-mane hynrei uba khongkhong bad uba bitar bieij ha ïing, ngi dang tei ïa ka kynroh kaba kdor ïa ka lawei jong ki khun. Ym lah ban long u rangbah balang uba bha ha ïing-mane, hynrei ha la ïing pat ngi long ki kpa kiba buhrieh ïa ka jingshisha. U Amos u da pynrem jur ïa kito kiba wan duwai ha temple hynrei ha shabar pat ki pynshitom bad shukor ïa kiwei. Ka hok bad ka jingmane Blei kaba shisha ka dei ban shlei naduh la ka ïing shaduh shabar. Lada ngi leh ïa kaba hok kiei kiei kat kaba ngi kwah ki tuid kum ka wah kaba shlei, ha ki ïing ki sem ki jong ngi.
To ngin pynrung ïa u Amos sha ki longïing jong ngi, ka ïing ka dei ka Jaka kaba khuid bad kaba shisha. Ha ka longïing, ki rangbah ki dei ban pynshisha ba ka hok bad ka jingshisha ka shlei bad ka jingmane Blei kaba shisha ka sdang na ka rukom leh kaba hok kaba don ka jingkitkhlieh ïa la ka ïing bad ïa la ki khun ki kti. Ka kamram u kpa ka long ban tei ïa ka duwan jingdwai ha la ka ïing man la ka step bad man la ka janmiet.
KA JINGPYNKUT BAD KA JINGKYNTU.
Ki Kmie ki Kpa kiba ieit ïa u Trai kiba ieit ïa ka jingshisha, kin nym shañiah ïa ka Sawar ha ki nonghikai Sunday School, hynrei ki bat ïa ka Sawar ha la ki kti kum ka jingkitkhlieh na ka bynta la ka jong ka ïing ka sem. To ngin pynskhem ïa ka por duwai ha la ki ïing ki sem man la ka miet manla ka step. Ngin pynbeit ïa la ka lynti ïaid jong ki khun da ka ktien ka jong U Blei ban ieng thik sak kum ka kynroh kaba khuid na ka bynta ka lawei jong ka Balang.
To ngin pynkut ïa kane ka khubor da ka jingkyntu ki Proverb 22:6, kaba ong “To hikai ïa u khynnah ha ka lynti kaba u dei ban leit, te un ym kynriah na ka wat haba u la tymmen”.bad ruh da ka kular kaba skhem bad u Joshua: “Manga bad ka ïing jong nga, ngin shakri ïa U Trai.” (Josua 24:15).
U Blei un da kyrkhu ïa kine ki ktien kiba nga la pashat ha phi baroh kiba pule ïa kane ka khubor.
