Mawkyrwat, Naiwieng 01
Ka Hynñiewtrep Youths’ Council (HYC), Mawkyrwat Circle kum shibynta ban pynsngewthuh paidbah halor ka jingma kaba mih na ka jingpyndonkam ïa u drok bad kiwei ki jait jingdih pynbuaid bad kum shibynta ban kyntiew ïa ka jingïalehkai sports na ka bynta ki samla, ha ka sngi Thohdieng ka la pynlong ïa ka Charity Football Match cum Awareness Programme halor ka phang pdeng, “Say No to Drugs” (Ong Em ïa U Drok) ha madan MDSA, Nonglang, South West Khasi Hills District, Mawkyrwat.
Ha kane ka lympung, ki don saw tylli ki kynhun kiba la wan ban ïashim bynta, kata ka Police Department FT, Nongsharai Shilliang Um FT, Nongsharai Mawkyrwat Area FT bad Shiparalok FT.
Ha ka jingïalehkai semi-final kaba nyngkong, ka Police Department Football Team ka la pynliem ïa ka Nongsharai Shilliang Um Football Team da 2-1 kol. Katba ha ka semi-final kaba ar, ka Nongsharai Mawkyrwat Area Football Team ka la jop ïa ka Shiparalok Football Team da 5-4 kol lyngba ka tie-breaker.
Ha ka jingïakhun final, ka Police Department Football Team ka la long ka lahduh, hadien ba ka la pynliem ïa ka Nongsharai Mawkyrwat Area Football Team lyngba ka tie-breaker da 3-1 kol.
Nalor ka jingïalehkai kynjatbol, la pynlong ruh ïa ka jingïakop tan tyllai (Tug of War) hapdeng ka Women Police Mawkyrwat bad ka Chirynjup Village Organisation, Mawlangwir, ha kaba ka Women Police Mawkyrwat ka la khur ïa ka jingjop da 2-1 poiñ.
Ha kane ka sngi, la donlang u Bah Renikton Lyngdoh Tongkhar, MLA ka Mawkyrwat Constituency, bad u Bah Pius Marweiñ, MLA/MDC ka Ranikor Constituency. La sakhi lang ruh ïa kane ka prokram da ka jingdonlang u Bah B. Kharjana, Additional Superintendent of Police, South West Khasi Hills District, u Bah Robert Kharjahrin, u Bah Rickle Marngar, u Bah R.R. Lyngkhoi, Myntri Shnong Mawkyrwat, ki nongkitkam jong ka MDSA, ki nongïalam jong ki sengbhalang bapher bapher ba kynthup ïa ka SSSS, HNYF, HANM, HITO, HYC bad KSU, ryngkat bad kiwei kiwei ki riew paidbah.
