Shillong, Naiwieng 02
Ka lympung ïalehkai SSA Champions Cup 2026 kan sdang ha ka sngi Ba-ar ha kaba ka Mawlai SC kan ïakhun pyrshah ïa ka Lamlynti FC ha SSA Stadium ha ka por 2:30 nohphai sngi.
Kane ka lympung ka la long kaba kham pher ha kaba ki lahduh bad kiba wan ba-ar naduh ka Shillong Premier League, First, Second, Third bad Fourth Division kin ïakhun pyrshah. Ïa ki 10 tylli ki kynhun la phiah ha ki ar tylli ki group, hashwa ban kin jam pat sha ka semi final.
Ka lahduh jong u snem ba la lah, ka Nongkseh kam shym la lah ban pynurlong ban rung biang sha kane ka lympung namar kam shym la ïoh rung hapoh ka thup kaba ar jong ka Shillong Premier League mynta u snem. Dei tang ka Shillong Lajong kaba la lah ban wanphai biang sha kane ka lympung ha ka sien kaba ar.
Ka Mawlai kaba long ka lahduh ha ka SPL, ka la shah rem noh ha ka Nongkseh ha ka semi final jong ka SSA Super Cup. Te kumta la khmih lynti ba ka Mawlai kan ïalehkai bha ha ka Champions Cup namar ka la khmih lynti ban khur biang sa kawei ka nam jop shwa ban kut u snem.
Ha kawei pat ka liang ka Lamlynti, ka dei ka kynhun kaba la wan ba-ar ha ka Third Division. Ka la bat ïa ka kyrdan ba hakhlieh ha ka jingïalehkai group bad ka la wan ba-ar ha ka Super 8 (group), kata hadien ïa ka Sanmer. Kane ka kynhun ka la lah ban pynliem ïa ka Umiew Maw U Sam ha ka jingïashut tie-breaker hashwa ba kan shah rem ha ka Sanmer, kaba long ka lahduh.
Ha kaba ïadei bad kane ka lympung, ki klob naduh ka Second haduh ka Fourth Division ki ïoh ban shim wai (loan) haduh san ngut ki rangïalehkai na kiwei pat ki klob, katba ki klob jong ka SPL bad First Division kin hap ban pynmih da kijuh ki rangïalehkai.
Kumba ka paw ka Lamlynti ka la shim wai ïa san ngut ki rangïalehkai kata u rangïalehkai ‘dien u Lukas Syngkli bad u rangapkol u Nister Suting na ka Langsning, u rangïalehkai shapdeng u Nikelson Bina na ka Nang-kiew Irat, u rangïalehkai ‘dien u Shanborlang Nonglait na ka Laitkor bad u Shaitborlang Khar-krang, uba long u rangïalehkai shakhmat na ka Mylliem Lum.
Lah ban kdew ki kynhun jong ka SPL bad First Division ki la lah ban ïalehkai bha ha kaba baroh saw tylli ki la rung sha ka semi final. Hynrei mynta ka kynti ym lah ban ong mano ba kham khlaiñ namar ki kynhun naduh ka Second, Third bad Fourth Divisions ruh ki la long ba la khreh ban mih madan ryngkat ka jingpynkhlaiñ ïa la ki kynhun.
