Yemen, Risaw:
Ki lehnoh Houthi kiba ju ioh jingkyrshan na ka Iran, ha ka Sngi Palei ki la iathuh ba ka jingther bom jong ka Saudi sha ki thaiñ ba shong ki riew paidbah ha ka thaiñ Taiz jong ka phang Sepngi ha Yemen, ka la shim ïa ka jingim jong ki 12 ngut ki mynsiem briew ba kodor bad ka jingdon kiba mynsaw bad kiba shah ktah na ki jingleit thombor ka Saudi ka la nang kiew naduh ba sdang ka jingiakynad.
Namar la ong ba ki lehnoh Houthi bad ka sorkar Yemen kaba ju ioh jingkyrshan na ka Saudi Arabia bad kaba la ithuh da ka pyrthei, ki la ïa pyni bor markylliang la jan man la ka sngi naduh ba ka jing-ïashongsuk hapdeng kitei ki arliang mamla, ka la tlot noh ha kane ka aïom lyiur. Ha kine ki taiew ba ladep, katei ka kynhun ka la nang pynjur shuh shuh ïa ki jingthombor ïa ka Saudi Arabia.
“Kum ka jingkheiñ ba nyngkong, 12 ngut ki nongshong shnong ki la ïap bad lai ngut kiwei pat ki la mynsaw jur haba ki nongshun Saudi ki la thmu ïa ki ïing jong ki longïing jong u Ibrahim Saeed Mohammed Ahmed Al-Qouz bad u Al-Raabi Saeed Mohammed Al-Qouz,” group jong ka tnat pathai khubor Saba.
Palat 1,600 ngut ki briew ki la ïap ha Yemen naduh ba sdang biang ki jingïaleh pyrshah bad palat 275,000 ngut ki la phetwir, ong ka jingkheiñ jong ka United Nations.
Ha ka Sngi Balang, ym duna ïa ka 14 ngut ki briew, ki la iap ha ki jinghiar thma jong ka Saudi ïa kawei ka jaka theh umphniang bad ka iew, ong ka khubor jong ki Houthis, katba katei ka kynhun, ka la thmu ïa ka kad liengsuin, kaba don ha ka jaka sah jong ka sorkar Aden, kaba la pynmynsaw ïa ki riew paidbah.
Ha u Naitung, ka jingïasuk kaba tlot jong u snem 2022 ka la hap noh hadien ba ki Houthi ki la ailad ïa ka liengsuiñ jong ka Iran ban hiar ha ka nongbah Sanaa jong ka Yemen kum ka jingpyrshah ïa ka jingsynshar jong ka Saudi halor ka suiñbneng jong ka Yemen, kaba la pynmih ïa ki jingthombor kiba jur bha.
Hadien kata, ki Houthi ki la pynbna ïa ka jingkhang duriaw ïa ka Saudi Arabia bad ki la sdang ban hiar thma ïa ki jhad, ki jaka bad ki jaka theh umphniang jong ka, ha shwa ba kin kurup ïa baroh kawei ka rud duriaw Red Sea jong ka Yemen ha ka jingïakhih kaba jem. Ki Houthi ha kajuh ka por ki la pyntip ba ki ju thombor ïa ki liengsuiñ jong ka Saudi.
Ka Yemen ka la jynjar na ka thma naduh u snem 2014, ha kaba ki Houthi ki la kurup ïa ka nongbah, ha kaba ka kynhun synrop ba la ialam da ka Saudi Arabia ka la rung sha katei ka jingialeh hadien shisnem ban kyrshan ïa ka sorkar.
