Shillong, Naiwieng 03
Ka Sports Cell jong ka Hynñiewtrep Youths’ Council (HYC) ka la pynrem jur ïa ki dkhot ka Meghalaya Cricket Association (MCA) halor ka rai ban pynmih da kawei pat ka kynhun, ha ka Ranji Trophy (Plate Group), kaba dangïaid mynta pyrshah ïa ka Nagaland ha kane ka nongbah.
Kat kum ka kyrwoh ba la pyllait da u Chairman ka HYC Sports Cell u Bah Franky Kharumnuid, la ong ba katei ka jingjia ka la long ka jingjah burom ïa ka Jylla hi baroh kawei. “Ka long kaba sngewsih ban ïohi ba ki nongïalehkai ki shah pynjah burom bad shah kynnoh tang namar ka jingïapher jingmut hapoh ki para dkhot hapoh ka synjuk.
“Ïa ka kriket dei ban rai ha madan, ym ha ki kamra. Ki nongkitkam ka MCA ki dei ki nongsumar ïa ka jingïalehkai, ym ki trai jong ka jingïalehkai kriket ha Meghalaya. Ka jingïalehkai kam dei ban long ka jingmyntoi na ka bynta ki nongkitkam ne ban don ka jingpher jingmut hapdeng ki para dkhot,” la ong ka kyrwoh.
La ong ruh ba kum kine ki jingleh ym tang ba ki pynduh mynsiem ïa ki nongïalehkai, hynrei ki pynsniew ruh ïa ka nam jong ka Meghalaya ha ki jingïalehkai jong ka ri. “Ka long kaba sngewsih haduh katta katta ba kito kiba la shaniah ban ïada ïa ki jingmyntoi jong ki nongïalehkai jong ngi, ki buh pynban ïa ka kriket ha jingma.
Te kumta ka HYC Sports Cell ka la kyntu ïa ka BCCI ban shim khia ïa kane ka kam bad ban pynthikna ba kanlong ka jingmyntoi ïa ki nongïalehkai kriket ka Jylla.
