Washington, Naiwieng:
U Suhas Subramanyam, uba la long kum u nongai jingmut jong u President Barack Obama, u la shah jied biang kum u dkhot jong ka iing dorbar jong ka US.
U Subramanyam, 40 snem ka rta, u la jop na ka distrik ba 10 jong ka seng Congress hapoh ka nongbah Virginia, ha kaba u la ioh palat 61.5% ki vote pyrshah ïa u kyrtong ka Republican, U Dave Beckwith, uba la lah ban jop da 36.4% na ki vote kiba u la ioh jingkyrshan.
La kha ïa u hapoh ka nongbah Houston bad ki kmie – kpa jong u ki dei ki nong India, u la ioh jinghikai halor ka kam saiñ pyrthei ha ka por ba u dang pule kolej ha Tulane University ha New Orleans, ha kaba u la iarap ban pynlong ïa ki nongtrei mon sngewbha ban tei pat ïa ki shnong kiba la shah ktah ha ka ‘eriong Katrina.
U la shakri ha Capitol Hill kum u nongïarap, ha kaba u la trei ban pynïar bad pynbha ïa ka jingïoh jingsumar sha ki million ngut ki nong America, u la ïarap ban tei ïa ka jingïatylli jong ki arliang mamla ban kyrshan ïa ka jingpynkylla ïa ka jingwan buhai shnong, bad u la shna ïa ki aiñ ban kyntiew ïa ki lad kamai bad ka jingai pisa na ka bynta ki riewshlur, ki tymmen, bad ki longïing kiba trei.
Hadien ba u la ïoh ïa ka kyrdan pule aiñ ryng-kat ka burom ha North-western University, u Subramanyam u la shakri kum u nongai jingmut ha ka White House ha ka liang ka teknoloji jong u President Obama.
Hadien ba u la trei shipor ha White House, u Subramanyam u la sdang ïa la ka jong ka kam rit kam ria ha Loudoun County bad u la trei ruh kum u EMT ba trei mon sngewbha bad kum u nongpynlip ding.
U la shah jied ha ka dorbar bah jong ka Virginia ha u snem 2019 bad u la shakri ar samoi. U Subramanyam u dei ruh u dkhot jong ka Virginia State Senate shwa ba un shah jied sha ka iing dorbar jong ka US ha u snem 2024.
