Washington, Risaw:
Ka America, ka la hiar thma sop-sop ïa ka Qeshm jong ka ri Iran, kaba dei ka dewlynnong kaba heh tam ha Strait of Hormuz, hapdeng ka jingkyntu jong u Myntri Rangbahduh jong ka Israel, u Benjamin Netanyahu, ban leit hiar thma thymmai pyrshah ïa ka Iran, hadien ka ilekshon shiteng samoi jong ka US. Ki jingiakhih, kiba la pynbna nyngkong eh da ka Wall Street Journal, ki i kumba ki long kiba duna bad kim dei satia ka jingsdang biang ïa ki kam ialeh kiba heh, ong uwei u heh jong ka US ha ka tnat pathai khubor Reuters.
Katkum ka jingiathuh jong ki heh ka US, la ong ba ka jinghiar thma kaba khatduh ka long kaba ïada ha ka jinglong ban khanglad ïa ka Iran ban ïoh ban hiar thma lait luid ïa ki jhad khaïi ha ka duriaw Strait of Hormuz, ka lynti ïaid jhad ba kongsan na ka bynta ka jingshalan umphniang kaba la khang lynti bha naduh ba ka thma ka la sdang ha kaba kut jong u bnai Rymphang.
Da kaba kdew na ki heh jong ka US, ka WSJ ka la iathuh ba ka US kam shym la pynbna paidbah ïa ki jingshah thombor khnang ban ym ai dak ïa kano kano ka jingthmu ban sdang biang ïa ki kam ialehkai kiba heh.
Katba ka lad pathai khubor jong ka sorkar Iran, ka IRNA, ka la iathuh ba la iohsngew ïa phra tylli ki jingbthei kiba bud ryntih ha katei ka ïew bad ba ki don ki nongshong shnong kiba la iathuh ba ki la iohi ïa ar tylli ki liengsuin kiba her ha ki bneng jong ka.
Kitei ki jingjia ki la jia hapdeng ki khubor ba la kynnoh ba u PM Israel u Netanyahu u dang pynbor ïa u president jong ka US Donald Trump ban pyrkhat ïa ki kam shipai ba thymmai pyrshah ïa ka Iran hadien ka elekshon shiteng samoi jong ka US, wat haba u nongïalam jong ka US u la lehkai ïa ka jinglah ban wanphai biang sha ka thma, da kaba pynpaw ïa ka jinglah ban don ka jingïateh kular.
“Ngi la don ka thma bad ka Iran. Ngi la jop…ngam tip lada phi khot wat ïa ka thma namar ba ngim shym la leh ïa kano kano ka jingialeh la bun bnai,” la ong u Trump ha ki nongthoh khubor ha ka sngi Nyngkong.
U la ong ruh ba ka jingiateh bad ka Tehran “ka lah ban jia.”
Ka dor jong ka umphniang, kaba la phah ban kiew bha namar ka jingkhang jong ka Iran ïa ka lynti pynmih bor ding jong ka Strait of Hormuz, ka la hiar palat hynriew percent ha ka sngi Nyngkong halor ka jingkyrmen halor ka jinglah ban kut noh jong ka jingïakynad.
