Miami, Naiwieng:
Uwei u briew u la ïap bad arngut kiwei pat ki la mynsaw jur ha ka Sngi Balang haba ka helicopter jong ki ka la hap ha Biscayne Bay hajan Miami, ong ki heh sorkar.
Ka liengsuiñ Robinson R44 II, ka la leit hap bakla ha ka por janmiet jong ka Sngi Balang hajan ka Bill Baggs State Park, harud Key Biscayne, katba ka dang leit ban ring dur ïa ki lieng halor um, ong ka ophis jong ka Miami-Dade Sheriff.
Ka heh Rosie Cordero-Stutz, ka la ïathuh ha ka jingïalang bad ki nongthoh khubor ha ka por mynstep ba ïa ki arngut kiba lait im la rah sha ka trauma centre kaba don hajan ha ka jinglong jingman kaba shitom hynrei ka long kaba jem bha.
Ki nongpyllait im na ki katto katne ki tnat treikam jong ka thaiñ, kumjuh ruh ki shipai pahara rud duriaw jong ka US bad ki bor pahara khappud jong ka US, ki la ïarap ïa kane ka jinghap jong ka liengsuiñ.
Haba ki kynhun pahara duriaw jong ka ophis jong u sheriff ki la poi ha katei ka jaka, ki la iathuh ba ki la lap ïa u nong Samaria babha uba pyrshang ban iarap ïa uwei na ki nongshah pyniap bad ban ialam ïa u sha rud duriaw. Ki nongpynlip ding na Miami, ki la pyrshang ban pynim ïa ka jingim jongu, hynrei um shym la lait im satia, la ong ka Cordero-Stutz.
Ha kajuh ka por, ki ophisar ka tnat iada khappud ki la lap ïa kitei ki arngut kiwei pat ki briew na katei ka helicopter bad ki la aiti ïa ki sha ki nongpyllait im na Miami-Dade ban kit sha hospital.
Ka Cordero-Stutz ka la iathuh ruh ba mynta ka tnat ba dei khmih ka dang tohkit bniah halor ka daw jong ka jinghap ka liengsuiñ. Ka South Florida ka la mad ïa ka jinghap slap kaba jur bha ha kine ki khyndiat sngi ba ladep, tangba ym shym la tip la ka jinglong ka suiñbneng ka la don bynta ne em ha katei ka jinghap jong katei ka liengsuin.
