Jerusalem, Naiwieng:
U President jong ka Israel, u Isaac Herzog, ha ka Sngi Balang, u la pdiang ïa ka rai ba la pynskhem jong ka ilekshon parliament ha ka taiew ba la dep, kum kaba tehsong katkum ka ain bad sdang ïa ka jingiasyllok bad ki nongmihkhmat jong ka seng, halor ka jingthaw ïa ka sorkar kaba thymmai.
Katei ka sienjam, ka la buh jingeh ïa ka jingpyrshang jong u Myntri Rangbahduh ka ri, Benjamin Netanyahu, ban pynjah burom ïa ka jingthep vote, ha kaba ma u bad ki paralok jong u, ki la duh ïa ka jingbun paid jong ki ha parliament, kaba la tip kum ka Knesset, katba ki seng ba la ïalam da ki Arab, ki ïoh ïa ka jingjop kaba khraw ha ka histori.
“Ka ilekshon ka la kut. Mynta ka dei ka por ban iakynduh ïa ka jingshisha,” la ong u Herzog.
U Netanyahu bad ki nongkyrshan jong u, ki ju pynpaw ïa ki jingkynnoh ki bym don nongrim, ba ki seng ba la ïalam da ki Arab, ki la “tuh” ïa ka ilekshon, kaba lah ban long da ka jingïarap jong ki bar ri.
U Herzog u la sdang ïa ka jingïasyllok bad ki nongïalam jong ka seng ha ka miet jong ka Sngi Balang ban tip ïano ban jied ban thaw sorkar, ka rukom treikam kaba lah ban wanrah ïa ki nongïaleh pyrshah jong u Netanyahu ha ka bor synshar.
Ka tnat ilekshon jong ka Israel ka la ong kham mynshwa ha ka sngi thohdieng ba hadien ka jingtohkit kaba bniah ïa ki jingkynnoh thok jong baroh ki seng, kam shym la lap “ïa kano kano ka jingpynshisha ba don ki jingbym beit kiba pynthut ïa ka jinglong hok jong ka ilekshon ne kiba ktah ïa ka jingmih jong ka.”
Ka seng Likud jong u Netanyahu kam shym la jubab satia halor ka jingkylli ban ai jingkynthoh.
Ka jingtohkit ba kyrpang jong ka tnat syntiat jong ka Shin Bet, kaba la khlieh da u David Zini, uba la shah thung bad uba iaineh ha u Netanyahu, halor ki jingkynnoh ba ki bar ri ki donkti ha kane ka ilekshon, ka dang iaid shakhmat.
Ha ka jingïalang shimet ha ka Sngi Balang jong ki dkhot jong ka komiti ilekshon, u khlieh jong ka, u nongbishar jong ka ïingbishar ba ha khlieh duh, u Noam Sohlberg, u la pule ïa ka jingbishar bniah na ka Shin Bet da kaba ong ba ka tnat ka ngeit ba ka la don ka “jingjia kaba la saphriang bha kaba kynthup ïa ka jingwan rung jong ki ri kiba heh bha sha Israel kynthup na ki ri bar ri.”
Ka Shin Bet kam shym la ai kano kano ka sakhi ban batai ïa ka jingong jong ka. Ka Associated Press ka la ioh ïa ka jingthoh jong ka jingbishar bniah na uwei u briew uba la wan sha katei ka jingialang bad uba la pan ban nym pynpaw kyrteng ban iakren ïa ka jingialang kaba khang.
