Shillong, Naiwieng 05
Ka Shillong Lajong FC ka la long ba la pynkhreh na ka bynta ka jingïalehkai Indian Football League (IFL) 2026-27 kaba nyngkong ha la ïing pyrshah ïa ka Chanmari FC ha ka sngi Thohdieng ha ka por 6:30 janmiet ha SSA Stadium, Polo.
Kane ka kynhun ïalehkai ka dangshu wanphai na ka jingïalehkai shabar na la ïing hadien ba ka la khur ïa ka jingjop ha kaba sdang ïa kane ka lympung da kaba pynliem ïa ka Mohammedan SC da 1-0 kol ha ka sngi Saitjaiñ jong ka taïew ba la lah.
Lyngba ka jinglah ban khur ïa ki lai poiñ, ka Shillong Lajong ka la khmih lynti ban pynpaw ïa ka mynsiem ïakhun ha la ïing hakhmat ki paidbah nongkyrshan bad ban pynurlong ha ka ban khur ïa ka jingjop.
Na ka liang u coach kane ka kynhun u Birendra Thapa u la pynpaw ka jinghun halor ka jingjop ka kynhun ha kaba sdang jong kane ka lympung bad ka la khmih lynti ba kan ïalehkai bha ha kine ki jingïakhun ka ban nangwan.
Watla u coach u kham tip bha ïa ka rukom ïalehkai ka Chanmari FC kaba long ka kynhun kaba khlaiñ bor ha kane ka aïom hadien ba ka la ïoh ban soi ïa ki rangïalehkai nabar ri, te kumta u la ban jur ba ka Shillong Lajong ka donkam ban dangpynleit jingmut bad ban pyni ïa ka mynsiem ïakhun bad ban ym ailad ïa ka liang pyrshah.
U Thapa u la pynpaw ruh ïa ka jingdonkam ban ïalehkai bha ha la ïing, da kaba pynpaw ba ka kynhun kan ïakhun tyngeh ha kane ka jingïalehkai ha ïing. U la pynpaw shuh shuh ïa ka jingshaniah ha ka kynhun, lyngba ka jingwan jong ki lai ngut ki rangïalehkai nabar ri u Jota, Joedson bad u Arthur.
U rangïalehkai shakhmat ka Lajong na Brazil u Jota, un hap ban ïakhun pyrshah ïa ka klob kaba rim ka jong u ka Chanmari FC ha ka sien kaba nyngkong eh.
U Jota u la pynpaw ïa ka jingkmen halor kane ka jingïakhun, da kaba kam ba kan long kaba kyrpang ban ïalehkai pyrshah ïa ka klob kaba u la ju mihkhmat mynshwa. Hynrei u la kren shai ba ka jingpyrkhat jong u ka dangneh beit beit sha ka Shillong Lajong, da kaba kular ban aiti shispah na ka shispah na ka bynta ban ïarap ïa ka kynhun ba kan khur ïa ki lai poiñ.
Une u rangïalehkai shakhmat u la pynpaw ruh ïa ka jingangnud ban ïalehkai bha hakhmat ki nongkyrshan na la ïing bad ban pynurlong ïa ka jingjop.
Na ka liang ka Shillong Lajong ka la khmih lynti ïa ka jingtuid ki paidbah nongkyrshan ki ban pyndap ïa ka stadium ha kane ka jingïakhun kaba nyngkong ha la ïing.
