Jowai, Naiwieng 04
Ki jingïakhun jong ki lympung ïalehkai 1st Division bad Super Division ba la pynïaid da ka Thadlaskeiñ Sports Association (TSA) ki la kut ha ka jingïakhaid ha ka sngi Balang ha Multi Sports Complex kaba ha Wahïajer.
Ha ka jingïalehkai jong ka 1st Division hapdeng ka Evergreen SC bad ka Namdong B ki la ïakhaid mar 2-2 kol.
Ka Evergreen ka la thep kol nyngkong lyngba u Rimon Kharmuti (33′) bad u Robert Syngkon (35′). Hynrei ka Namdong B ka la pynphai kylla ar kol lyngba u Phrangsngi Law (50′) bad u Kynsai Lamurong (54′).
Haba phai sha ka jingïalehkai jong ka Super Division hapdeng ka Wahïajer SC bad ka Nongkhroh Krem Kum ki la ïakhaid mar 1-1 kol.
Ka Nongkhroh Krem Kum ka la pynkhih jar nyng-kong lyngba u Teilang Pyngrope (45+3′). Hynrei ka Wahiajer SC ka la ïakhun tyngeh ha ka kylla miet bad ka la pynphai kylla shi kol lyngba u Hame Dkhar (79′) na ka bynta ban ïakhaid mar shi kol.
