Amlarem, Naiwieng 05
U Winchester Nyalang ula khyrwit ïa ka hat-trick bad pynlong ïa ka Mawlong SC ba kan pynliem noh ïa ka Ladjaple SC da 6-1 kol ha ka lympung ïalehkai 3rd Division Football League ba la pynïaid da ka Amlarem Sub-Divisional Sports Association (ASSA) ha ka sngi Palei ha Mini Stadium Ladjaplem, Amlarem.
Ha kane ka jingïakhun u Winchester ula ïoh ban thep ha ka minit kaba 11, 32 bad 46 lyngba ka penalty. Katba ïa kiwei pat la pynbud da u Deibor Jungai (3), Victor Lamat (31) bad u Kynmawlang Langshiang (39′). Na ka liang ka Ladjaplem ka la pynphai kylla shi kol lyngba u Teishwa Misery (35).
Ha jingïakhun kaba bud, ka Hynriam YSSCT ka la jop da 1-0 kol ïa ka Thawusdiah United bad ïa kane la thep da u Daphimon Pamksang (50).
Haba phai sha kawei pat ka jingïakhun hapdeng ka Mukhim Bro’s bad Sengsamla Amlari ki la kut ha ka jingïakhaid hadien ba kim shym la lah ban thep kol.
