Shillong, Naiwieng 04
Ka Mawpat Sports Club ka la ïoh ban khur ïa ka lai point hadien ba ka la pynliem noh ïa ka Nongkrem SC da 2-1 kol ha ka jingïalehkai jong ka Group-A jong ka lympung ïalehkai SSA Champions Cup ha ka sngi Balang ha SSA Stadium, Polo.
Watla ka Nongkrem ka la ïoh ban pynkhih jar nyngkong lyngba u Sawadame Tang (21′), hynrei ka Mawpat SC ka la ïeng skhem na ka bynta ban pynphai kylla ar kol lyngba u Thompson Lyngdoh (46′) bad u Sparkle Khongshei (68′).
Kampher ba wat hadien ba ka Nongkrem, kaba bat ïa ka kyrdan kaba ar (runners-up) ha ka lympung ïalehkai First Divi-sion, hynrei ka Mawpat SC kaba long ka lahduh lahduh ha ka Second Division, ka la lah ban ïalehkai bha lyngba ka jingïoh ban shim wai 5 ngut ki rangïalehkai na ka byntsa katei ka lympung bad kane ka la pynkylla ïa ka sur ïalehkai jong ka na ka bynta ban khur ïa ka jingjop.
Hynrei ha kaba sdang ka jingïakhun, ka Nong-krem ka la ïalehkai bha bad ban lah ban tynjuh borbah ïa ka Mawpat, kaba plie lad ïa u Sawadame Tang ba un ïoh ïa ka kabu kaba biang ban pynkhih jar.
Haba wan ban bteng pat ïa ka kylla miet, ka Mawpat SC ka la wan ban mih madan da kawei pat ka sur ïalehkai jong ka, kaba marsien ïasdang ka la ïoh shwa kawei ka kabu ksiar lyngba u Thompson, uba la khyrwit jam bha ïa ka bol kham na kyndong.
Hadien kane, ka Maw-pat ka la nangïoh shuh shuh ki kabu ksiar, kaba la sdang ban ñion kylla ïa ka kut ïalehkai ka Nongkrem.
Dei kane ka rukom ïalehkai ka la pynlong ïa ka Mawpat ba kan ïoh ban thep biang sa shi kol bad ban pynlong syndon ïa ka jingjop.
Kane ka lympung kan bteng biang ha ka sngi Saitjaiñ ha kaba yn pynlong ïa ka jingïalehkai jong ka Group-B ha kaba kin don ar tylli ki jingïa-khun; ha ka por 12:30 mynsngi ka Shillong Lajong FC (kaba wan ba-ar ha ka SPL) kan ïakhun pyrshah ïa ka Sanmer SC (lahduh ka Third Divi-sion) bad ban bynrap sa ka jingïakhun hapdeng ka Mawkhar SC (lahduh ha ka First Division) ïa ka Sohryngkham SC (ba wan ba-ar ha ka Second Division) ha ka por 3:45 nohphai sngi.
