Turkey, Naiwieng:
Katkum ki khubor, la ong ba 8 ngut ki briew ki la shah siat iap ha ki lai tylli ki shnong ha ka thain sepngi jong ka Turkey pdeng ha ka sngi Thohdieng, la iathuh ki heh sorkar katei ka thain, katba ka jingwad briew kaba jur ka dang iaid shakhmat ban lap ïa u nongsiat.
“Kaba sngewsih ka long ba 8ngut ki nongshong shnong jong ngi ki la duh noh ïa la ka jong ka jingim, bad uwei u la mynsaw jur na ki jingshah thombor da ki tiar ha ka Jylla jong ngi,” la ong ka ophis jong u Lat ka Afyonkarahisar.
Kane ka jingjia ka la jia ha ka por janmiet ha kawei ka jaka nongkyndong kaba don hajan Afyonkarahisar, ka shnong kaba don shiteng lynti hapdeng ka nongbah Ankara bad ka nongbah Izmir kaba don harud duriaw.
La lap ïa arngut ki kynthei kiba la shah siat ha kawei ka surok ha ka shnong Yukaritandir, hynrei wat la la pynkit mar mar ïa ki sha Hospital, baroh arngut ki la khlad noh, ong ka tnat pathai khubor jong ka jylla Anadolu.
La lap sa lai tylli ki met iap ha ka shnong Kiyir, kaba jngai shiteng kynta ban iaid kali shaphang shathie lam mihngi, bad sa lai tylli ha ka shnong Ayazini, kaba don sa shiteng kynta ban iaid kali shaphang mihngi, la ong ka khubor.
Uwei pat u briew uba la lap ba u don ha ka jingpang kaba jur bha, u dang ïakhun na ka bynta ka jingim jong u ha hospital, la ong ka khubor.
, khlem da ong shano ki la mynsaw.
Ka NTV private television ka la iathuh ba ki pulit ki dang beh ïa u briew uba niah ïa ka kali rong saw uba la iohi ba u phet krad na katei ka jaka.
