Washington, Naiwieng:
Ha kane ka khubor ba sngewtynnad ïa ka ri India, la ong ba ka rai jong ka ilekshon shiteng samoi jong ka US, ka la pynduh jingkyrmen ïa u President ka America- u Donald Trump bad ïa ki nongialam ka seng Republican namar ba mynta kim don bor shuh la ha ka Senate ne ha ka ïing dorbar thaw aiñ. Watla ka sain pyrthei jong ka US ka dei baroh shaphang ka US, hynrei ha kane ka kynti ka don katto -katne ki jingktah jong ka ri India. Kaba khatduh ka dei ka Nithya Raman, kaba la jop ha ka ilekshon nongmihkhmat jong ka nongbah Los Angeles.
Da ka jingjop jongka, la ong ba kitei ki 2 tylli ki nongbah kiba heh tam ha ka ri America mynta la ioh ban synshar hi da ki nongialam kiba dei ki nong India. Uwei pat u dei u Zohran Mamdani, uba la paw khmat kum u nongjop ha ka ilekshon nongmihkhmat jong ka nongbah New York ha u snem ba la dep wat hapdeng ka jingialap kaba jur bha da u President Donald Trump bad ki Republican pyrshah ïa u.
Baroh arngut ka Nithya bad ka Mamdani ki dei kiba la ai jingkyrshan da ka seng Democratic Socialist of America (DSA).
Da kaba kubur ïa kane ka jingshisha, u Dkhot jong ka Congress, u Shashi Tharoor, u la pyllait ïa ka jingthoh jong u hapoh ka rynsan X, “Ka khun jong ka Thiruvananthapuram, ka @nithyavraman, ka dei ka Mayor ba thymmai jong ka Los Angeles! Bad ryngkat bad u @ZohranKMamdani ha New York, ka long ka jingsarong kaba khraw ïa ka ri India ba ïa kitei ki 2 tylli ki nongbah ba heh tam jong ka ri America, yn synshar bad pyniaid da ki nongialam kiba dei ki nong India.
