Shillong, Naiwieng 12
Ka lympung ïakop siatkhnam NTPC Senior National Archery Championship 2026 ka la sdang ha ka sngi Palei ha madan Parade ha Umsawli, Shillong ha kaba la wan shim bynta da kumba 785 ngut ki nongsiatkhnam na ki 43 tylli ki Jylla bad Sports Control Board, kynthup ïa 24 ngut na Meghalaya.
Ïa kane ka lympung ka ban neh hynriew sngi kynthih, la plie da u Symbud Myntri Rangbah ka Sorkar Jylla u Bah Sniawbhalang Dhar, ha kaba la ïadon lang ki dkhot ka Meghalaya Archery Association, ka Archery Association of India bad kiwei kiwei.
Ïa kane ka lympung la pynïaid da ka Meghalaya Archery Association ha ryngkat ka jingkyrshan lang da ka tnat ïalehkai jong ka Sorkar Jylla. Ki jingïakop ha kane ka lympung ki kynthup ïa ka 46th Senior Recurve, 22nd Senior Compound bad ka 33rd Senior Indian Round National Championships jong ki shynrang bad kynthei.
Kitei ki jylla kiba la wan shim bynta ki long ka Goa, Andhra Pradesh, Assam, Daman & Diu, Jammu & Kashmir, Ladakh, Meghalaya, Mizoram, Tripura, Andman & Nicobar Islands, Arunachal, Bihar, Chandigarh, Andhra Pradesh, Delhi, Gujarat, Haryana, Himachal Pradesh, Rajasthan, Sikkim, Jharkhand, Nagaland, Odisha, Karnataka, Kerala, Madhya Pradesh, Punjab, Maharashtra, Manipur, Telangana, Tamil Nadu, Pondicherry, Uttar Predesh, Uttarakhand bad West Bengal. Katba ki board kiba la wan shim bynta lang ki long ka Airports Authority of India Sports Control Board (AAISCB), All India Police Sports Control Board, Central Sports Control Board, Munitions India Sports Promotional Council (MISPC), Petroleum Sports Promotion Board, Railway Sports Promotion Board, Services Sports Control Board bad ka Steel Plants Sports Board.
Haba ai jingkren ha kane ka sngi u Bah Sniawbhalang u la pynpaw ba kane ka jingïalehkai siatkhnam ka la long kaba paw bha ha kane ka Jylla naduh ki por kiba mynshwa hyndai namar ka dei ka jingïalehkai tynrai jong u khun Khasi. U la pdiang sngewbha ïa baroh ki nongshim bynta kiba la wan shim bynta ha kane ka nongbah bad u la pynshlur ïa ki ba kin ïalehkai bha khnang ba ki lah ban khur ïa ka jingjop.
Kumba ka Jylla Meghalaya kan pynlong ïa ka 39th National Games ha u snem ban wan, u Bah Dhar u la ai khublei kitbok ïa baroh ki nongshim bynta ba kin ïalehkai bha khnang ba ki lah ban ïoh rung sha katei ka lympung ïalehkai baheh jong ka ri.
Ha kane ka sngi sdang la lah ban pynlong shwa tang ka jingïakop siat jong ka Recurve jong ki shynrang bad kynthei.
Lah ban kdew ka Jylla ka la ïoh ban pynlong nyngkong ïa ka 2nd Senior Recurve National Championship ha u snem 1975, kumjuh ha u snem 1986, ka 20th Senior Recurve bad ka 6th Senior Indian Round National Championships ha u 1999. Katba ïa ka Junior National Championship ka la ïoh ban pynlong ha u snem 2011.
