Shillong, Jylliew 07:
Ka shlem treikam jong ka District Sports Officer (DSO) ka West Khasi Hills kan pynlong ïa ka District Level Subroto Mukherjee Cup Football Tournament naduh 26 tarik u Naitung ha Mairang.
Ïa kane ka lympung la phiah ha ki lai tylli ki kyrdan ïalehkai, kita ka Under-14 jong ki khynnah shynrang bad ka Under-17 kan long na ka bynta ki khynnah kynthei bad shynrang.
Kat kum ka kyrwoh ba la pyllait da ka DSO Kong Balarina Syiem, la ong ba ïa ki form lah ban ïoh na ka shlem treikam u BDO, Mairang/Mawthadraishan bad ka shlem treikam ka DSO na Nongstoiñ ha ki por long trei.
Ka tarik ba khatduh ban pdiang ïa ki form kan long ha ka 13 tarik mynta u bnai bad ban pynpoi ïa ki form ha kitei ki shlem treikam. Ka jingkhmih bniah ïa ki rta jong ki khynnah kan long ha ka 20 tarik mynta u bnai ha madan Dommawlum, Pyndengumïong kaba ha Mairang naduh 10 baje mynstep.
Na ka bynta ka Under-14, ki khynnah ki dei ban long kiba la kha shwa lane hadien ka 1 tarik u Kyllalyngkot 2010. Katba ha ka Under- 17 ki khynnah ki dei ban long la kha shwa lane hadien ka 1 tarik u Kyllalyngkot 2007. Ki khynnah ki dei ban wanrah lang ïa ki kot ki sla ki ban pynshisha ïa ka snem kha, Aadhaar Card bad ki Identity Card ba la ïoh na ki skul ba ki pule. Na ka bynta ki jingtip ba bniah ki lah ban phone ha ki number 9402300795 & 8014251242.
