Mr. D. Pakyntein
Ki jingdheng kali ki dei ki jingeh ha man la ki nongbah bad ki shnong. Ha Shillong baroh ngi la duh noh ka bor pyrkhat shaei ngin leit bad nangno ngin iaid. Ki nongshong shnong ka Raid Laban, haba ki mut ban leit sha Civil Hospital, IGP ne Khyndailad, ki dei ban leit khun ia ki kali lyngba ka Anjali Petrol Pump, ka jaka kaba jur bha ka jingdheng kali. Ban lait na kane ka rukom pyniaid kali kaba ithamula, bad shaiong ngain (mind boggling).Hap iaid beit lyngba ka Pine Mount School tang ban pynkhapngiah kai ia ka surok na Barik sha Civil Hospital. Ban pyniaid kali sha kiwei pat ki surok, ka wanrah ia ka jingdheng kali. Man ka por, la ju iohi ba ki nongniah kali ki thurmur palat bad ki kali sorkar ki pynkhein ain palat, ki niom naphang bad ki kyrkieh ia kaei? Shitom ban ioh ia ka jubab.
Ka Sorkar ka lah dei ban pynbiang noh ki jaka kiba kham i donburom bad shngain na ka bynta ki nongdie madan. Ngi iohi barabor ba ki surok PWD la pynkylla sha ki jaka ieng kali. Peit ia ki surok naduh Laban Sport Club shaduh Seven Set School. Lada iaka surok na Crinoline sha Barik la shah ban iaid bad leit bad wan (two-way street) kam long kaba eh ba leh kumjuh ia ki surok naduh Laban Sport Club shaduh Seven Set School (two-way streets) khnang ban lait ka jingdheng kali shilynter ki surok Malki-Barik-Civil Hospital-Rhino, namar kiba bun ki kali bathmu ban leit sha ki thaiñ ka Raid Laban kin pyndonkam beit ia kitei ki surok ba don kam bha.Kitei ki surok ki iar bha bad lah ban shah ban pynieng kali tang shi lain. Ka surok na jaka ieng bus barim hajan Laban Police Station sha St. John School ka shem kajuh ka jingeh. La pynieng kali baroh shilynter, haduh bym don jaka shuh ia ki paidbah, khamtam ia ki khynnah skul ban iaid.
Ngi dei ban ai ka jingiaroh ia ka Seng Kynthei Cathedral Parish, Laitumkhrah, kaba la shim ia ka sien jam ban ai jaka pynieng kali. Hynrei dang don hi ki mutlop, kiba dang pynieng shilynter ka surok naduh gate shaduh Iingmane. Ym tang katta ar lain la pynieng ha surok bah, tang ban lait ban siew arphew tyngka. Kan myntoi aiu ban phah skul ia ki khun, namar man ka sngi la hikai ia ki kumno ban pynieng kali beain katba mon ? Ki nongleit shaw skul na Pine Mount, ki pynieng kali haduh lai lain, haduh ba hap khang ban iaid na Crinoline sha Red Cross, wat ia ka surok na Civil shaduh u mot jong u Bah Thrang Hok Rangad (bam kwai ha dwar U Blei) ym map shuh. Isynei ia ki pulit, namar ym don ba sngap. Ym lah leh ei ei, namar ym don jaka. Ka Pine Mount School bad ka Lady Hydari Park ki lah dei ban ai jaka, namar kane kam ktah ia ki jingialeh kai ki khynnah, lada peit ia ka jingheh ka jaka.
Ki briew kiba don bun tylli ki kali kim salia ia kata ka Odd – Even, ki don kali bad odd bad even. Ki kmen bha ban don ka ain ban ai rashon noh ia ki surok, tang ban suk ialade. Hap ban pyrkhat ruh na ka bynta kito kiba shim da ka ram tang ban ioh thied kali rim bad tad dor kum ki Maruti 800 ne Tata Nano. Hynrei ia ka khajna pat lah siew pura mar katjuh, ym shiteng dor. Namarkata,baroh ngi don ka hok ban ia pyndonkam lang ia ki surok.
