Karachi, Jylliew:
Ka khubor ba la ioh lum ka iathuh ba ka Pakistan kam shym la don shuh kano kano ka lad ka lynti hadien ba ka Sri Lanka, Bangladesh bad Afghanistan ki lah weng noh ialade na ka jingai jingkyrshan ha kaba iadei bad ka jingtyrwa jong ka ri Pakistan na ka bynta ban pyntreikam da ka ‘Hybrid Model’ ha ka lympung ialehkai Kriket ka Asia Cup. Kumta na ka liang jong katei ka ri kaba long ka pdeng-duh ha ka ban pynlong ia katei ka lympung ka pynpaw mynta ba ka lah ruh ban weng noh ialade na ka ban shimbynta ha katei ka lympung ialehkai ka ban sa long ha u Nailur mynta u snem.
Kumjuh ruh, katkum ka ‘Hybrid Model’ ia kaba lah tyrwa shakhmat da u nongpyniaid bahakhliehduh ka Pakistan Cricket Board (PCB) u Najam Sethi, ka long ba ka Pakistan kan pynlong lai haduh saw tylli ki jingialehkai jong ka lympung ha la ri lajong, katba kiwei pat ki jingialehkai ba dangsah kiba kynthup ia ka jingiakhun pyrshah bad ka India lah ban pynlong ia ki ha kano kano ka madan ka bym shym la don sha kano kano ka ri (India-Pak). Katei ka jingai jingmut bad ka jingtyrwa da utei u khlieh nongialam ka PCB ka lah paw hadien ba ka India ka lah kyntait na ka bynta ban leit ia aireng sha Pakistan na ka daw jong ka jingiakynad hapdeng ki ar ri.
Kumta ruh ka lah pawshai mynta mynta ba ka Sri Lanka, Bangladesh bad Afghanistan ki lah ai ka jingkyrshan ka jong ki sha ka BCCI kaba ialeh mynta ban khynniat ia katei ka jingai jingmut da u Sethi na ka bynta ban pynkynriah noh ia ka lympung ialehkai baroh kawei na katei ka ri.
Ki tyllong khubor ki iathuh ruh ba u Sethi u lah don lypa ka jingiadei kaba jan ba ki dkhot jong ka Komiti kaba peit ia ka kam ialehkai Kriket ha Pakistan bad ruh bad ki katto katne ki nongkitkam ba pawkhmat jong ka sorkar na ka bynta ban iamir jingmut halor ba ka nongrim ba ka synjuk jong u ka ieng lada ka ri baroh kawei kam shym la ioh shuh ia ka hok na ka bynta ban pynlong ia ki jingialehkai katei ka lympung ha-la-ri lajong.
U Sethi u lah iai ban rung da kaba ong ba lada ia ka lympung lah pynkynriah noh na ka ri sha kawei pat ka madan ialehkai kaba long hapdeng, ka kynhun ialehkai katei ka ri kan ym shimbynta ha ka lympung bad ki tyllong khubor ki iathuh ruh ba mynta ka lah don ha ka jingthoh ba ka PCB kan iaid beit shakhmat na ka bynta ban pynsangeh ruh wat ban pyniaid beit shakhmat ia ka lympung.
Shuh shuh ka khubor ka iathuh ba ka lah ruh ban don ka lad-ka-lynti jong ka jinglah ruh ban urlong ba ia ka lympung ialehkai baroh kawei lah ban pyndep noh shi syndon ha une u snem ba mynta bad ka kynhun ialehkai ialehkai na India, Sri Lanka, Bangladesh bad Afghanistan ki lah ruh ban kut noh syndon ka jingthmu jong ki na ka bynta ban ioh ialehkai ha kum katei ka lympung ialehkai ba 50-over ha shuwa ba kin mih madan ha ka World Cup.
