![Mynsaw 7 ngut na ka jingsynreit kuli naphang ha Virginia Virignia](https://unongsainhima.com/wp-content/uploads/2023/06/Virignia-720x480.webp)
Virginia, Jylliew:
Ki pulit ka Virginia ha ka Sngi Balang ki la ioh kem noh ia uwei u runar uba don haduh 4 tylli ki suloi rit namar ka jingsynreit kuli naphang hapoh kawei ka park kaba don ha ka thaiñ Richmond jong ka nongbah Virginia ha ka janmiet Sngi Ba-ar. Ha kane ka jingjia la ong ba 5 ngut ki la mynsaw bad 2 ngut pat ki la khlad noh hapdeng ka jingsumar namar ka jingjur jong ki jingmynsaw.
U heh pulit ba shipor jong ka Richmond, u Rick Edwards ha ka janmiet Sngi Ba-ar u la pyntip ba 7 ngut ki briew ki la shah siat ha ka jingsynreit kuli naphang hapdeng ka jing ialeh kmen, ha kaba 3 ngut napdeng jongki, ki don hapdeng ka jingma kaba khraw. Kane ka la jia ha ka thaiñ Richmond kaba don hapoh ka nongbah Virginia.
Haba iadei bad kane, 2 ngut ki la shah rah noh sha thanat naka bynta ki jingtohkit kiba bniah. Hynrei hadien kumba katto katne por ki pulit ki la pyntip ba ki la bat noh ia utei u runar 19 snem ka rta bad uba don jing ithuh ia iwei napdeng kitei kiba shah siat baroh.
La ong ba kitei ki 7 ngut ki la mynsaw na ka jingsynreit kuli naphang jong utei u runar hapoh ka Altria Theatre kaba don ha Richmond, Virginia, hapdeng ka jingïaleh kmen ha katei ka jan miet Sngi Ba-ar. Shuh shuh ruh la ong ba katei ka jingleit jong u ha katei ka jaka, ka long tang ban leit kput ia utei uwei u briew uba iashun bad don daw bad u. Hynrei ha katei ka janmiet u la synreit kuli naphang ia kat kiba don ha katei ka jaka wat haba kim shym don daw ne pynthud eiei ia u.
Kumta, ia utei u runar lah ban pynngat ha 2 tylli ki kyndon pynkheiñ aiñ jong ka jingpyniap briew bad ha kiwei kiwei de ki kyndon hadien ka jingshim rai jong ka ïingbishar.
Ka nongrah ktien jong ka tnat pulit na Richmond ka la pyntikna ia katei ka jingmynsaw kitei kiba ngat ha katei ka jingsynreit kuli bad ia mynta hi, ym shym don jingma eiei ia ki paidbah kiba iaid ba ïeng bad ia kito kiba shong ha katei ka thaiñ.
Katei ka jingsiat ka la jia hapoh jong ka Monroe Park hadien ba la dep ban pynlong ia ka ‘Graduation Ceremony’ jong ka Huguenot High Scool. Namar katei ka park ka don markhap bad ka long ruh ka phyllaw jong ka Virginia Commonwealth University.
Ha ka Sngi Ba-ar, ki don haduh 3 bynta ki ‘Graduation Ceremony’ lane ki jingpynkup burom ia kiba la pass na katei ka jaka pule.
Hynrei ha ka por kumba 5:15 jong katei ka jan miet, la ioh jingtip na ka Virginia Commonwealth University ba ka don ka jingsynreit kuli hapoh ka Monroe Park. Katba tang hadien shi kynta pat la pynbna ba kam shym don kano- kano ruh ka jingma ia kito kiba sah ne kiba iaid lyngba ruh ia katei ka thaiñ.
Ia mynta hi, ki bor pyniaid ka Richmond ki dang ialeh ban peit bniah ia ka jinglong- jingman jong ka Monroe Park, da ka jingiatrei lang ruh bad ka RPD bad RPS, khnang ban ioh ia ki jingtip kiba bniah haba iadei bad katei ka jingjia ha katei ka sngi. Hynrei ki bor pyniaid ki la shu maham ia ki paidbah nongshong shnong bad kumjuh ruh ia ki paidbah nongleit- nongwan ba kin kiar shwa shipor na kaba leit sha katei ka jaka.