Moscow, Nailur:
Ka Russia ha ka Sngi Nyngkong ka la khang noh ïa ka ophis treikam jong ka Germany kaba don hapoh Saint Petersburg, da kaba dawa ruh ïa ki briew ka Germany kiba treikam ha katei ka ophis ba kin mih noh napoh ka ri hapoh ka 18 tarik jong une u Nailur.
Ka jingiadei hapdeng ka Moscow bad ka Berlin – kaba la long kaba jur bha naduh ka jinghiar thma jong ka Russia ha Ukraine – ka la nang kiew shuh shuh ha ka taiew ba ladep, ha kaba ka Germany ka la kynnoh ba ka Russia ka la pynlong ïa ka jinghiar thma da ki drone ha ka kad liengsuiñ jong ka Leipzig.
Ka Germany, ha ka taiew ba ladep, ka la khang ïa ka jaka treikam jong ka Russia ha Bonn bad ïa ka jaka pynlong kolshor jong ka Russia ha Germany.
Ka tnat kam bar ri jong ka Russia, ka la ong ha ka jingpynbna ba ka “weng noh ïa ka jingmynjur jong ka halor ka jingtreikam jong ka Consulate General jong ka Federal Republic of Germany ha Saint Petersburg.”
Ka la ong ba ka consulate “ka dei ban sangeh noh ïa ka jingtrei jong ka ym kham hadien ïa ka 18 tarik u Nailur, 2026 bad baroh ki nongtrei jong ka ki dei ban mih noh na ka Russia Federation ym kham hadien ïa katei ka tarik.”
Ka la ong ba ki nongtrei jong ka Goethe Institute ki dei ban mih noh hapoh ka 13 tarik u Nailur.
Ka Germany ka dei kawei na ki paralok ba kongsan jong ka Ukraine bad ki ri Europe ki la sngewkhia halor kaei kaba ki ong ba ka dei ka jinghiar thma hybrid ha ka khyndew jong ki.
Ka EU, ka la ong ba ka jingjia ha ka kad liengsuiñ jong ka Leipzig, kaba donkti bad ka drone kaba la pynbthei, ka don ïa baroh ki dak jong ka “jingleh kam sniew ba la kyrshan da ka sorkar”.
Ka Russia ka la kyntait ïa kitei ki jingkynnoh. Ha ka taiew ba kut, u Myntri kam bar ri jong ka Russia, u Sergei Lavrov, u la kynnoh ïa ka Germany, ba ka dei ka Germany hi kaba wanrah thma biang”.
