Srinagar, Jylliew:
Ka Myntri Rangbah barim bad ka President jong ka seng PDP ka Mehooba Mufti hynnin ka sngi ka la kyntu ïa ka seng jong ka ba kan long ka sur jong ki bym don sur. Kumba la ïathuh ka tyllong khubor, la ong ba kane ka la long ha ka por ba ka la ai jignkren ha kawei na ki jingïalang na ka bynta ka distrik Srinagar ha ka jaka treikam jong ka seng ha Srinagar.
Ha katei ka jingïalang la leit ban ïashim bynta da ki heh nongïalam jong ka seng na ka distrik bad ki heh nongkitkam jong ka seng na Srinagar.
Ka Mehbooba Mufti ka la ïai ban da kaba ong ba ka la donkam ba ka seng kan long ka sur jong kito ki bym don sur bad ka jingbym lait ang jong ki briew jong ka J&K.
Ka la ong ba ka seng ka la dei ban nang treikam bha shuh shuh na ka bynta ban lah ban synshar dalade bad ban pynïoh ha ki briew ïa ka jingsuk ha kane ka bynta jong ka ri.
Ka Mehbooba ka la pynsngew ïa kiba bun ki jingdonkam jong ki briew bad kumjuh ban pynpaw ïa ki jingeh ba ki briew ki ïakynduh na ka por sha ka por.
Kane ka jingpynlong jingïalang jong ka Mehbooba ka la long khyndiat sngi ba ka la ïoh ïa ka Passport hadien lai snem ba ka la phah ban pynthymmai ïa ka.
Ka la ïoh ïa ka Passport ka ban treikam da kumba10 snem, la ïathuh ka tyllong khubor ha ka sngi U Blei.
Hadien ka jingïakhun kaba la kham slem katkum ki kyndon jong ka aiñ ha Delhi High Court, ïa ka Passport la ai sha ka Mehbooba.
Ka Passport jong ka ka la kut por ha u snem 2019 bad naduh kane ka por ka la kyrpad na ka bynta ka jingpynthymmai ïa ka. Ka la long ar sngi hadien ba ka la don ka jingbishar bniah jong ka Jammu and Kashmir High Court.
Ka Passport ba la ai sha ka Mehbooba, kaba la long ka Myntri Rangbah kaba khatduh jong ka jylla Jammu & Kashmir ha ka por ba kam pat shah phiah ka la long ha u snem 2019, ka la treikam naduh ka 1 tarik, Jylliew, 2023, haduh ka 31 tarik, Jymmang, 2033.
Ha kaba ïadei bad ka jingthmu ban ai ka jingkyrshan ïa ki briew jong ka thaiñ, ka Mehbooba ka la kyntu ïa ki nongïalam ba kin nang pynkhlaiñ ïa ka seng naduh tynrai.
