Bhubaneswar, Risaw:
Ka Odisha ka kular ban pynurlong ïa ka por ba la buh da u Myntri ka tnat ki kam pohïing jong ka sorkar pdeng u Amit Shah ban pynlong ïa ka India kaba lait na u drok ha kaba kut jong u snem 2029, ong u Myntri Rangbah ka jylla u Mohan Charan Majhi ha ka sngi U Blei.
Haba kren ha ka ‘Jiban Jindabad 2.0’, ka prokram pynsngewthuh paidbah ba la pynlong da ki pulit jong ka Commissionerate hangne, u Majhi u la pynïadei ïa ka jingdih drok bad ki kam runar kiba shyrkhei tam bad ki kam thombor ïa ki kynthei.
Haba pynpaw ïa ka jingsngew ba ki jingdih buaid ki pynjot ym tang ïa ka jingim jong u briew shimet hynrei ïa ka longïing bad ka imlang sahlang baroh kawei, u Myntri Rangbah u la ong ba ka sorkar jylla ka dang ïai bteng ban bud ïa ka polisi ban pyrshah ïa u drok.
U Myntri Rangbah u la ong ba ka jylla ka la khang shi syndon ruh ïa ka jingpynmih duma bad ka jingdie ïa u duma bad ka pan masala bad gutkha ba don Nicotine, bad pynbna ruh ïa ki skul bad ki kolej kum ki jaka ba lait na ki jingdih buaid.
U la pynpaw ruh ïa ka jingsngewkhia ba ka Odisha ka don ha ka kyrdan kaba ar ha ka ri ha ka jingïap jong ki briew ha ki jingjia aksiden ha surok namar ka jingñiah kali da kaba buaid.
U la pynbna ba yn ym shah ban shna dukan kyiad thymmai ha kane ka jylla ha kine ki lai snem ban wan.
U la bthah ïa ki pulit jong ka Odisha bad ka tnad Excise ban sdang ïa ki sienjam kiba tyngeh bad ban shim ïa ki lad ki lynti kiba kham tyngeh ym tang pyrshah ïa ka jingdie kyiad beaiñ hynrei wat ïa ki jingdoi kiba ktah kiba kynthup ïa u Ganja, Opium, Cocaine, Heroin, Grown Sugar bad ki dawai thok.
Haba batai ïa ka Jiban Jindabad jong u snem ba la dep kum ka jingjop ha kaba pynthikna ïa ka jingkoit jingkhiah ha ka bor pyrkhat jong ki samla bad ban ïada na ka jingkwah pynïap ïalade, u Majhi u la ong ba kane ka jingpynmih thymmai ka dei ka jingpyrshang kaba kham khlaiñ ban pynjngai ïa ki samla na ki jingdih buaid bad ban ïalam lynti ïa ki sha ka jingpule, ka jingïalehkai Sport bad ka jinglah ban pynmih ïa ki sap jong ka jingnang shna jingshna.
U Majhi u la pyllait paidbah ïa ka website kaba kyrpang jong ki pulit jong ka Commissionerate Police, kaba la shna kum shi bynta jong ka Nasha Mukt Bharat Abhiyaan. Ha kane ka sngi la ïadonlang u DGP (in-charge) u Vinaytosh Mishra, u Police Commissioner u S Dev Datta Singh, ki heh pulit, ki samla pule bad kiwei kiwei.
