Thiruvananthapuram:
Katkum ka jingïathuh jong ka Keralam la ong ba ki la don kumba 120 ngut ki briew kiba la ïap na ka jingpang khlam haduh mynta u snem, kaba jan long lai shah ïa ki 43 ngut kiba ïap ha baroh u snem 2025, kaba la pynmih ïa ka jingeh ha ka koit ka khiah jong ki paidbah.
Ki la don haduh 110 ngut ki briew kiba la ïap mynta u snem, kane ka la long ha ki saw bnai ba la dep. Ka jylla, ka la ïoh ruh ïa 11,319 ngut ki nongpang Influenza kaba dei ka jingpang Flu haduh ka 3tarik, Risaw, ha kaba 145 ngut ki dei ha ki lai sngi jong une u bnai.
Ki riew shemphang ki la pynshong nongrim ïa ka jingkiew jong ki nongpang namar ka jingdon ryngkat jong u slap, ka jingkhriat bad ki jingïalum briew na ka jingdon ka Onam kiba bun briew nalor ka jingpynbun ïa ki jingleh Test.
Ki la ong ruh ba ka jingkiew stet kam dei kaba jia tang ha ka jylla.
“Ka jingkiew jong ki nongpang kam dei tang ha Keralam. Ka Delhi bad kiwei kiwei ki jylla ruh ki la pyntip ïa kane. Ka jingsaphriang ha kiba bun ki bynta jong ka India ka dei kaba ïadei bad ka jinglong jong ka suiñ bneng ha kane ka aïom slap.
Ka jingdonlang jong u slap uba jur, ka jingkhriat bad ki jingïabun paid ha ka por ba don ka Onam ka mut ba ka jingpang ka la saphriang sha ki briew kiba kham bun,” ong u Dr. Rajeev Jayadevan, uba long u nongai jingmut jong ka IMA Research Cell ha ka jylla, u Dr Sunny P Orethel, uba long u Pulmonologist jong ka Kochi, u la ong ba ka jingdon jong ka jingleh Test ka la pynpaw ïa ka jingnang don bun jong kiba ïoh ïa ka jingpang.
“Kiba bun ki hospital mynta ki Test ïa ki nongpang kiba don ka jingpang shit na ka bynta kane ka jingpang Flu. Nangne la ithuh shai ba ka jingdon jong kiba shah ktah ha ka jingpang ka la nang bun katkum ka jinglong jingman. Shisien ba la lap ïa ka daw, ngi la lah ban ai dawai pynïap ïa ki khñiang jingpang kiba biang,” u la ong.
Ka jingpang ka dei ka jingpang kaba ju wan ha ka añom, ha kaba ka jingshit bad jingktha met ki long ki dak kiba ju jia.
Ka bynta kaba kane ka jingpang ka ktah ka dei ïa ki tymmen ha ka jylla, ryngkat bad kito kiba don ïa ki jingpang kiba ïadei bad ka rukom im, ka cancer bad kiba sngaid ne dap khleiñ.
Ki riew shemphang ki la ong ba ka jingduna jong ka bor met ban ïaleh pyrshah ïa ka jingpang ka long ka daw kaba la nang pynkiew ïa ka jingïap jong ki nongpang.
