Agartala, Jylliew:
Ki bor pulit jong ka jylla Tripura ki la pyntip ba ha ka 6 tarik mynta u bnai uwei u shipai ‘rifleman’ jong ka Tripura State Rifles (TSR) u la dkhat jubor ïa ka jingim lade da kaba siat ïap ïalade da ka suloi pahara, katei ka jingjia ka la jia ha ka thaiñ North District.
Kat kum ki jingïoh lum jingtip la ïathuh ba katei ka jingjia ka la jia ha ka shlem ‘headquarters’ jong ka TSR 13 Battalion kaba don ha ka shnong Daspara (Subhashnagar, Kanchanpur subdivision), North district. U shipai ka TSR u ba la dkhat jubor ïa ka jingim lade u dei u ba la tip kyrteng kum u Sarat Singh – nongshong shnong ka jylla West Bengal.
Kat kum ki jingïoh lum khubor la ïathuh ba ha katei ka ‘headquarters’ ki la don katto katne ki jyrwit jyrwat ha ki rukom treikam ban ai shuti ïa ki shipai. La ïoh jingtip ruh ba na ka liang u Assistant Commandant u la don bynta ha ki kam ban wanrah ïa ki jyrwit jyrwat kiba jwat ïa katto katne ngut ki shipai jong katei ka shlem trei kam. La suba sniew ruh ba ka jingdkhat jubor jong u Sarat Singh ïa la ka jong ka jingim ka lah ban dei na katei ka daw.
Hadien katei ka jingjia, la ïathuh ba na ka liang ki bor pulit jong ka jylla ha ryngkat ka kynhun ‘forensic’ ki la leit mar mar sha katei ka jaka ban lum jingtip halor katei ka jingjia. Hadien katei, ïa ka metïap jong u Sarat Singh la leit ban pynkynriah noh sha Kanchanpur Hospital na ka bynta ban pyndep ïa ka ‘post-mortem’.
Na ka liang ki bor pulit la pyntip ba ki la pynrung da ka mokotduma halor katei ka jingjia na ka bynta ban pynlong ïa ki jingtohkit kiba dang sha. Ka tnat pulit ka la pyntip shuh shuh ba ïa ki jingtip kiba kham bniah yn sa lah ban pyntip hadien ba la pyndep ïa ka ‘post-mortem’.
