Shillong, Jylliew 08:
Ka Tura bad Jowai kin pynlong ïa ki jingïakhun semi final wat ba nyngkong jong ka Meghalaya State League 2023 ha ka sngi Saitjaiñ ha kaba la khmih lynti ba saw tylli ki kynhun kiba ïoh rung sha ka semi final kin ïalehkai bha.
Ïa kine ki jingïakhun semi final yn pynlong ha la ïing bad shabar (home-and-away) ha kaba ki jingïakhun jong ka wat ba ar kin long ha ka 13 tarik. Katba ïa ka jingïakhun final yn pynlong ha ka SSA Stadium kaba ha madan First Ground, Polo (Shillong) ha ka 17 tarik.
Ka jingpynïakap ïa ki kynhun na ka bynta ka semi final la pynlong ha ka nongbah Shillong ha ka 5 tarik. Ka Khliehmawlieh (lamkhmat na ka Group-D) kan ïakhun pyrshah ïa ka Mawlai (lamkhmat na ka Group-A), katba ka Rangdajied United (lamkhmat na ka Group-B) kan ïakynduh pyrshah ïa ka Shillong Lajong (lamkhmat na ka Group-C).
Ka jingïakhun semi final jong ka wat ba nyngkong hapdeng ka Rangdajied United bad ka Shillong Lajong kan long ha Kiang Nangbah Stadium kaba ha Jowai ha ka por 1:30 noh phai sngi. Katba ka semi final wat ba nyngkong hapdeng ka Khliehmawlieh bad Mawlai kan long ha Tura ha ka por 3:30 janmiet.
Ïa ka por la hap ban pynïapher namar ki bor pynïaid ka Tournament Committee ki la pynkhreh ban pyni paidbah (live) ha YouTube channel jong ka Meghalaya State League (youtube.com/@meghalayastateleague).
Ha ka jingshisha ka madan Chandmari kaba don ha Tura ka dei ka jaka ïalehkai na ka bynta ka Group-D bad la sakhi ïa ka jingwan tuid ki paidbah nongpeitkai. Kumta ïa ka jingïakhun semi final yn pynlong ha PA Sangma Stadium ha kaba yn ïadon lang ka MP jong ka Tura, ka Agatha K. Sangma kan long kum ka kongsan.
Ka Khliehmawlieh ka dei ka kynhun kaba la shim bynta ha ka MSL 2019, hynrei kam shym la lah ban ïoh rung sha ka semi final, katba ka Mawlai ka dei ka klob kaba dang thymmai ha kane ka lympung ha kaba ka la ïoh rung sha ka semi final mynta u snem.
Haba phai sha ka Lajong bad ka Rangdajied ki dei ki kynhun kiba la ïoh rung sha ka final ha ka MSL 2019 kaba la long ha Khliehriat, hynrei ka SLFC ka la khur ïa ka jingjop lyngba ka tie-breaker da 3-0 kol.
