Paris, Jylliew:
Na ka liang jong u khlur ialehkai phutbol jong ka Argentina uba ialehkai ruh na ka klob Paris Saint-Germain u Lionel Messi, u pynbna paidbah ha kaba iadei bad ka jingpynkhreh jong u ban iasoi bad ka klob ialehkai ha ka lympung Major League Soccer ka Inter Miami. Une rang-ialehkai u la jied mynta ia ka lynti ban leit ialehkai noh sha USA kum ka sienjam ba thymmai ha ka jingim ialehkai ka jong u nalor ka jingkwah jong ka klob Barcelona ban ioh iatreilang sa shisien, bad ka jingkhreh ban leit iasoi kontrak bad kawei na ki klob ialehkai sha Saudi Arabia.
Utei rangialehkai u lah dep ruh ban pynlut ia ki ar samoi ialehkai ha ka klob Paris Saint-Germain da kaba shimbynta ha ka jingialehkai ba khatduh ha ka sngi saitjain. U la leit pyniasoh bad katei ka klob ha u snem 2021 da kaba mih noh na Barcelona; ka klob ialehkai kaba u lah pynlut bun tam eh ka samoi ialehkai ha ka jingim ka jong u. Shuh shuh ruh ha kaba iadei bad katei ka bynta, ka MLS bad ka klob Inter Miami ka lah pynthikna shuh shuh halor katei ka khubor ha ki lad pathai khubor watla katei ka lympung ialehkai ka pynpaw ba ka kam ka dangsah mynta na ka bynta ban poi sha ka bynta ba khatduh jong ka jingiamynjur hapdeng ki arliang mamal.
Kum ban shu pynpaw hangne ka long ba u Messi u long uwei na ki khlur ialehkai bad u kyrtong jingjop ha ka jing-iaknieh ia ka khusnam Ballon d’Or, ha kaba u lah khur ia ka nam haduh hynniew sien bad mynta u khmih lynti ban kamai pat ia ki khusnam shimet sa shisien pat hadien ba u lah dep ban ialam ia ka kynhun Argentina sha ka lynti jingjop ha ka World Cup 2022 kaba lah long ha u bnai Nohprah 2022.
Shuh shuh ruh ka kam ialehkai phutbol ha ka pyrthei ka iai ap mynta da ka jingthrang hir-hir ban iohsngew ia ka rai jong u Messi hadien ba ka klob kaba u ialehkai mynta ka lah pynthikna ia katei ka khusnam ha kaba u long u khlur ialehkai ba pawbha ha ka pyrthei u ban sa mihnoh na katei ka klob ialehkai ba paw jong ka lympung Ligue1.
Kumta ruh ka klob Inter Miami ha ryngkat bad u trai iasambynta jong ka uba long u khlur ialehkai barim ka England u David Beckham uba lah seng ia ka klob ialehkai ha u snem 2018, u lah sloit noh ia u nongialam jong ka kynhun u Phil Neville dang ha ka taiew ba lah dep ha kaba ka kynhun ka shong mynta ha ka kyrdan ba shatraieh jong ka Eastern Conference.
Kiwei pat ki khubor ki iathuh ba ki nongkyrshan bahakhmat jong ka MLS kaba kynthup naduh ka Adidas bad Apple TV kiba lah jop ia ka hok jong ki ban pyllait paidbah ia ki jingialehkai jong ka lympung, ki lah mynta ban noh synniang sha kata ka jingiateh kontrak jong u Messi.
Na ka liang jong u Messi u lah pynpaw ruh ia ka jingkwah eh jong u ban leitphai biang sha ka klob barim kaba u lah ialehkai lah slembah, hynrei u pynpaw ia ka jingsheptieng ba ka jinghiran pisa jong ka klob baroh kawei ka lah pynlong ruh ia ka ban sangeh shuwa na ka bynta ka jingpynjlan ka jing-iateh kontrak ba la lah bad utei u rangialehkai kumba lah dep ban jia ha u snem 2021 bad lehse ka lah ban urlong biang sa shisien ha ki snem ialehkai ki ban dangwan.
Utei u rangialehkai u lah pynpaw ruh ba u don ia ka jingthmu na ka bynta ban iaisah biang sa shisien bad ka Barcelona ha ka lawei ialehkai ka jong u, hynrei u dap da ka jingartatien kaba khraw halor kata tang namar katei ka jingeh ba ka klob ka iakynduh mynta.
Kum ban shu pynkynmaw biang mynta ka long ba u Messi u lah pyniasoh bad ka skul ai jinghikai jong ka klob Barcelona naduh ba dang don ha ka rt a ba 13 snem hadien ba u lah mihnoh na ka ri jong u.
Kumta ha ka jingiaid lynti u lah kylla long u khlur ialehkai ba paw jong ka klob da ka jinglah ban kamai ia ki 672 kol ha ki 778 tylli ki jingialehkai ha ryngkat bad ka jinglah ban pynioh sha ka klob ia ki 35 tylli ki trophy jingjop kaba kynthup ia ki 4 tylli ki jingjop ha ka Champions League bad 10 tylli ki khusnam ha ka lympung Spanish La Liga.
Hadien ka jingbym thikna shuh ka kam ialehkai jong u ha ka klob, u Messi u lah mihnoh na ka bad leit pyniasoh bad ka Paris Saint- Germain da ka jingioh ban iatreilang bad u rangialehkai barim jong ka kynhun Barca u Neymar bad Kylian Mbappe ha ka liang ialehkai shakhmat ha ka kynhun, hynrei ka klob ka lah shem jingeh ha ka ban khur ia ki katto katne ki jingjop ha ka por ba u dang don bad ka, naba ka lah khur ia ka nam jingjop na ka lympung Ligue 1 tang arsien bad mad ruh ka jingshah weng noh na ka lympung Champions League ha ka rynsan iakhun pre-quarterfinal bad u Messi u kylla long u thong bahakhmat jong ka jngbitar ki paidbah nongkyrshan jong ka klob ka bym shym la ioh ban jam shakhmat ha katei ka lympung.
