Shillong, Jylliew 08:
15 ngut ki rangïalehkai kiba kynthup ïa lai ngut na ka Jylla ki la shah jied ban mihkhmat ïa ka NE Zone ha ka lympung ïalehkai jong ka BCCI ba la tip kum ka Duleep Trophy ka ban sdang naduh 28 tarik mynta u bnai haduh 28 tarik u Naitung.
Kine ki long u Kishan Lyngdoh, u Dippu Sangma bad u Akash Kumar Choudhary.
Ka Duleep Trophy, kaba dei ka lympung ïalehkai kaba heh ha ka almanak jong ka BCCI ha kaba la ju ïashim bynta ha ki hynriew tylli ki zone. Ïa kane ka lympung la sdang ha ka aïom ïalehkai 1961-62 bad ha kito ki por ki la don tang san tylli ki zone bad ka NE Zone ka la sdang naduh ka aïom ïalehkai 2019-20.
Ka selection committee jong ka NE Zonal ka la long ha Guwahati ha ka 4 tarik mynta u bnai. Ha kane ka jingïalang la pynïaid da u Naba Bhattacharjee uba dei Zonal Convener ka NE Zone na ka bynta ban jied ïa ki 15 ngut ki rangïalehkai. Hadien ba la dep ban bishar bniah ïa ki jinglah ïalehkai jong ki na baroh hynriew tylli ki jylla kiba ju ïashim bynta ha ki lympung ïalehkai ka BCCI ha ki kyrdan ïalehkai bapher bapher kiba kynthup ïa ka Ranji Trophy bad ka NECDC tournament ha ka aïom ïalehkai 2022- 23.
Ka rai kaba kham kongsan ha kane ka jingïalang ka long ruh halor ka jingjied ïa ki rangïalehkai na kitei ki jylla kiba la lah ban ïalehkai bha ha ka aïom ba la dep, ha ryngkat ka jingthmu ban nang kyntiew ïa ki bad ruh ban plie lad ba kin ïoh ban ïalehkai pyrshah ïa ki rangïalehkai ba kynsai jong ka ri.
Ha kane ka jingïalang la buh ruh ïa ka jingtyrwa na ka bynta ka jingkilan met kaba 10 haduh 12 sngi khnang ban pynkhreh ïa katei ka lympung bad ruh ban pynbeit ïa ka jaka kilan met.
Ki 15 ngit ki rangïalehkai kiba la shah jied ki long u R. Jonathan (Nagaland CA) kum u kapten, Nilesh Lamichaney (Sikkim CA) kum u Vice Captain, Kishan Lyngdoh (Meghalaya CA), Langlonyamba (Manipur CA), A.R. Ahlawat (Arunachal Pradesh CA), Joseph Lalthankhuma (Mizoram CA), Prafullamani (Manipur CA) – Wicket Keeper, Dippu Sangma (Meghalaya CA), Jotin Pheiroijam (Manipur CA), Imliwati Lemtur (Nagaland CA), Palzor Tamang (Sikkim CA), Kishan Sinha (Manipur CA), Akash Kumar Choudhary (Meghalaya CA), Rajkumar Rex Singh (Manipur CA) bad u Nagaho Chishi (Nagaland CA).
Katei ka komiti ka la thung ruh ïa u coach u Sonam Palden Bhutia (Sikkim), Physio – Th. Kamlesh (Manipur), Trainer – Vikash S. Chauhan (Meghalaya), Manager – Bah Dister Marbaniang (Meghalaya). Na ka liang ka BCCI ka la kyntu ban thung ruh ïa u Performance Analyst & Masseur.
Kiwei pat lai ngut ki rangïalehkai kiba la shu pynap lypa (reserve) ki long u Lee Yong Lepcha (Sikkim CA), Nabam Abo (Arunachal Pradesh CA) bad u Dika Ralte (Mizoram CA).
