London, Jylliew:
Na ka liang jong ka klob ialehkai phutbol ha ka lympung English Premier League ka Liverpool ka pynbna mynta ia ka jingioh jong ka ban iasoi kontrak ialehkai bad u rangialehkai na ka klob Brighton & Hove Albion bad uba long ruh u nongkhur jingjop ha ka lympung ialehkai World Cup 2022 na ka kynhun Argentina u Alexis Mac Allister, ha kaba katei ka klob ka lah pynpaw ruh ba ka jingiateh mynta bad u ka long da ka jingsiew kaba lah kot shaduh ka 55 million pounds ($69 million).
Kumjuh ruh utei u rangialehkai shapdeng jong katei ka klob u long u atiar ba nyngkong ha ka liang ialehkai shapdeng na ka bynta ban thaw bad kyntiew ia ka klob Liverpool ha katei ka liang ialehkai; kaba ka klob ka lah pyndep ia ka jingiaid lynti ba dang shu dep ka jong ka ha ka jaka ba san ha ka lympung EPL.
Na ka liang jong u manager ka klob Liverpool u Jurgen Klopp wat hadien ka jingioh mynta ban iasoi bad utei u rangialehkai, hynrei uba dang iai wad shuh shuh ki rangialehkai na ka bynta ban ioh iasoi thymmai hadien ka jngmihnoh jong ki rangialehkai shapdeng ka klob kata u James Milner, Naby Keita bad Alex Oxlade-Chamberlain.
Kumta ruh ka klob ka lah thong ruh hakhmat na ka bynta ka sien jam jong ka ban ioh iasoi bad u khlur ialehkai ka England u Jude Bellingham; uba pynkhreh mynta ban leit pyniasoh sha ka klob Real Madrid hadien ba ka klob ka lah mynjur bad pdiang ba kan siew haduh 100 million euros ($107 million).
