Shillong, Naiwieng 11
Lai taïew hadien ba u la kyllon ha ka por ka jingai jinghikai kilanmet, u coach ka Bayern Munich, u Vincent Kompany, u la wanphai biang sha madan ïalehkai jong ka klob ha Sabener Strabe, ha ka sngi Ba-ar.
Katkum ki khubor la ong ba u Kompany, u la poi ha ka jaka kilanmet jong ka Bayern Munich, ha ka step jong ka sngi Ba-ar hadien ka por 10 baje mynstep bad la ïohi ïa u, ba u dangtrei kam da ka computer jong u, ha ophis treikam jong u.
La ïathuh ba ïa utei u coach jong ka Belgium, uba la 40 snem ka rta, la pdiang sngewbha da u Assistant Coach, u Floribert Ngalula. U la pynlong ruh ïa ka jingïakren kaba jrong bad u sporting director u Christoph Freund.
Kane ka jingwanphai ka la pyni ïa ka jingsdang biang suki pa suki ïa ki kam ki jam jong u Kompany. La ïathuh ba u la peit ïa ki nongïalehkai kiba la mynsaw, kum u Luis Diaz bad u Jamal Musiala, ba ki dang bteng ban ïoh ïa ka jingkoit na ki jingmynsaw.
Lah ban kdew u Kompany u la kyllon ha madan ïalehkai jong ka Bayern ha ka 23 tarik u Risaw. La rah ïa u sha hospital, ha kaba ki doktor ki la lap ba u don ka jingshitom kaba la ktah ïa u sha ki bynta ki thied jabieng.
La batai ba ka jinglong jingman jong u ka long kaba biang, bad la pyllait noh ïa u na hospital ha ka 28 tarik u Risaw, naduh katei ka por, utei u coach u la nangïoh bor na ka jingshitom.
Ka Bayern ka la pynpaw bunsien ba une u rangïalehkai barim ka Belgium un ym pat lah ban sdang biang ïa ki kam tad haduh ba un da koit pura. U dkhot jong katei ka klob, u Max Eberl ba u la pynpaw ba u Kompany un donkam ban shongthait shwa tad haduh ba un da koit pura.
Ha ka por ka jingbym don ka jong u Company, u assistant coach jong ka klob u Aaron Danks u la ïalam ïa ka led Bayern ha ki san tylli ki jingïalehkai, ha kaba ka la jop saw sien bad ïakhaid shisien.
Hynrei, hadien ba u la wanphai biang sha madan kilanmet, u Kompany un sdang biang ïa ka kam pynïaid ïa ka kynhun na ka bynta ki jingïalehkai kiba dangsah, ha kaba ka Bayern kan ïakhun pyrshah ïa ka 1. FC Köln ha ka Bundesliga ha ka 20 tarik mynta u bnai.
