Shillong, Naiwieng 11
U Michael Carrick u la ong ba un ïai bteng kum u manager ka Manchester United watla kane ka kynhun ba khlaiñ bor ka la don ha ka jingma ha kaba ka lah ban shah pynhiar kyrdan noh na ka Premier League.
Kane ka kynhun ka la lah ban pynphai kylla ar kol hashwa ban wai na ka bynta ban pynïakhaid mar 4-4 kol pyrshah ïa ka Aston Villa ha ka sngi U Blei ha Old Trafford.
Kine ki kol kiba la thep hashwa ban wai ki la wan urlong lyngba u Joshua Zirkzee bad u Patrick Dorgu na ka bynta ban ïasam mar shi poiñ bad kane ka la ai mynsiem ïa u Carrick ban un dangïai sah ha kane ka kynhun hashwa ban sangeh shipor ki ar taïew ki jingïalehkai (international break).
“Ngim pat shym la khur jingjop ha ki jingïalehkai, hynrei nga khmih lynti ban ïaid shakhmat bad ban ïai bteng ban trei ïa kiei kiei kiba ngi la ju trei,” la bynrap u Carrick ha kawei na ki tyllong khubor.
“Da kaba pyni shibun ki jinglah ha ka jingïalehkai mynta ka sngi, ka la wanrah ka jingkhlaiñ ïa ka kynhun watla ki la don katto katne ki jingbakla bad jop ha ki jingïalehkai phutbol.”
“Ngi la don ha u Naiwieng,” la bynrap biang u Carrick da kaba ong, “Ngam sngewtynnad ïa ka jinglong jingman ha kaba ngi don, ngam sngewtynnad ïa ki jingmih kiba ngi la ïoh, hynrei ngi lah ban leh eiei halor kane.”
Utei u rangïalehkai shapdeng barim jong ka United u la kyntait ïa kano kano ka jingai jingmut ba u lah ban weng noh ïalade lada ka long na ka bynta ka jingbha jong ka klob bad u la ong ba un ym wad jingïakren bad ki heh jong u shaphang shano ka lawei jong u.
“Nga sngewthuh bha sha kano ka liang ka klob ka donkam ban leit, bad ngi danghap ban jop ïa ki jingïalehkai.”
U rangïalehkai barim ba 45 snem ka rta u la bynrap, “Nga tip shai shano ngi donkam ban leit bad kumno ngi donkam ban poi shata. Ngin shongshwa kumba shi sngi ne ar sngi, bad ngin hap ban pynkhlaiñ bha ïa ka kynhun khnang ba ngin long ba la khreh na ka bynta ka jingïalehkai ka ban wan.”
Kumba ka long mynta ka Manchester United (8 poiñ) ka la don ha ka kyrdan balai na shatrai, hadien hashwa ïa ka Sunderland bad ka Crystal Palace.
